Celtic an chak awlsam

Champions League khel thei dawn ta lo mah se Celtic-in Europa League tal khelh an duh tih an pholang a, Europa League playoff-ah Nilaini zan khan club ṭha AZ Alkmaar chu 2-0 in an hneh.

Celtic tan Japanese striker Kyogo Furuhashi a tlangnel chhunzawm zel a, Tom Rogic ball pek duhthusam chu minute 12-na lekah goal hmahruai ni turin a khung - minute 61-naah AZ defender Timo Letschert chuan an lamah a ti lut bawk a, 2-0 in Celtic an chak.

August 26 zanah team pahnih hian second leg an khel leh dawn a, Ange Postecoglou enkawl Celtic tan thlamuang taka awm hun a ni lo - Dutch club khelmuala inkhel tur an nih avangin boruak a danglam tawh ang.

Chutihrual chuan Furuhashi-a'n goal a khung chhunzawm zel avangin Celtic tan chuan result piah lamah lawmna tur a awm. Kum 26 mi striker hian Celtic-a pan hnuah inelna hrang hrangah match ruk a khel tawh a, goal ruk a khung tawh!

Season hmasa khan Japanese club lar Vissel Kobe tan a la khel a, inelna hrang hrangah match 22 khelin goal 16 a khung - European football-ah hming chher duhin Celtic a zawm a, tunah rih chuan a tifuh hle.

Celtic hian Asian player ropui ber pawla tam takin an ngaih Shunsuke Nakamura chu season li zet an lo kawl tawh a, Nakamura hian 2006-07 season-ah phei chuan SPFA Players' Player of the Year, SFWA Footballer of the Year, Celtic Player of The Year, Celtic Fans Player of the Year leh Scottish PFA's Goal of the Season chawimawina a dawng vek.

Furuhashi tan Nakamura 'level' thleng turin tih tur tam tak la awm mah se Celtic fan-ten Japanese legend Nakamura an lo mitthla ṭan tawh a nih pawhin dem theih an ni lo ang.