Coach nei lo pahnih inkhel dawn

FC Goa chuan zanin dar 7:30-ah league match khel turin Hyderabad FC an mikhual dawn a, ISL club pahnih hi coach nei lo ve ve an ni!

Indian Super League club thar Hyderabad FC hian an beisei ang result an neih theih loh avangin coach Phil Brown chu a hna aṭangin an chawlhtir a, Albert Roca an lalut.  Mahse, Bengaluru boss hlui Roca hian season thar aṭang chauhin Hyderabad hi a enkawl dawn a, Spanish manager awm hmain Javier Gurri Lopez chuan coach hna a chelh lailawk.

 

FC Goa hian rin loh takin coach Sergio Lobera an ban ve bawk a, Spanish coach thlaktu tur hi he thu buatsaih thleng hian puanzar a la ni lo. 

Goa technical director Derrick Pereira chu coach lailawk a nih a rinawm a, Indian coach hian tawnhriat a ngah tawh avangin ISL-ah talbuai lo tura ngaih a ni.