Chelsea tan Lukaku a lian lua e

Old Trafford-ah Chelsea an lenglut a, an player hlui an laklet theih loh Romelu Lukaku an ngam loh avangin point hmu loin an chhuahsan. Manchester United-in Pathianni zan khan Blues 2-1 in an hneh a, Belgian striker Lukaku hian Willian hmanga Premier League champion lai hmahruaina a sut hnuah Jesse Lingard goal khung tur a siam sak bawk.

Jose Mourinho hote hian match 28-ah point 59 hmuin an hmelma Liverpool chu pahnihnaah awm rei tir loin darkar 24 ral hmain an luahlan a, Antonio Conte hote erawh Tottenham Hostpurs an chak avangin panganaah an hnungtawlh thung.

De Gea, ti nge?
United player ṭha ber ang hiala chhal theih David de Gea khelh ṭhat zan a ni lo a, Spanish goalkeeper hian minute 32-naah Willian-a ball pet chu a sir chiaha a kal chungin a dang thei lo.

De Gea hian second half-ah pawh Brazilian midfielder Willian-a pet chu tiperin goalline a pelh hmain a hup bet leh hman a, ṭum danga United chhanhim ṭhintu keeper tih a hriat loh.

Amaherawhchu, De Gea chiah hi goal luh danah dem theih a ni lo a, Scott McTominay puitlin lohna langin a tawp thlenga Willian a um loh avangin Brazilian midfielder hian hun thawl a nei a, Eden Hazard-a ball pek a fing bawk.

Chelsea hi inkhela bul ṭan ṭha zawk an ni a, minute lina lekah Marcos Alonso cross fuh zet chu Alvaro Morata chuan vawi khatnaah pet nghalin United chhantu chu crossbar a ni.

Hun tawpah Blues hian siphurh sut theihna hun ṭha an nei leh a, Spanish striker Morata goal khung chu offside vangin pawm a ni lo. Amaherawhchu replay aṭanga en let chuan Victor Lindelof ke vangin Morata goal hi pawm zawk tur a ni a, assistant referee thutlukna vangin Blues-in point an hloh.

Beisei aia ṭha Lukaku
Pathianni zan hma khan Romelu Lukaku-a'n Premier League club pariat lakah United jersey hain goal a la khung lo a, Belgian striker lakah beisei a sang lo.

United ṭantuten Alexis Sanchez an thlir a, amaherawhchu rin loh lam aṭangin chhanna an hmu. Chilean forward-in United chance ṭha hmasa ber a hlah hnuah Lukaku chuan Alexis leh Anthony Martial te thawhrah sengin minute 39-naah siphurh sutna goal a khung a, Chelsea tlarhnung an ṭhiat nalh hle.

Second half pawh Lukaku a hnawksak a, Alexis-a siam bawk chu 'bicycle kick' hmanga pet nghalin Blues keeper Thibaut Courtois chuan a dang ṭha hle. Beligian striker hian minute 75-naah substitute Lingard-a tauh luh tur a siam sak leh a, United-in goal hnih an khung theih nan a inrawlh thuk hle.

United-in hun tawp lama goal venhim hna an thawh hnuah pawh Lukaku a la ṭangkai zui a, a thahrui leh a tlan chakna chu Blues defender tan buaina tham a ni a, club lian ngam lo tiha an sawi Lukaku chu league champion lai Chelsea-in an ngam lo.

An inrem ta
United leh Chelsea inkhelh ṭan hmain manager pahnih thu hmangin an inbei a, Mourinho chuan match fixing vanga Conte an hremna chungchang sawi chhuakin Italian manager hian thu tak hre si loa ṭawng chhuakah puh letin Portuguese manager chu 'mi te' tiin a dah hniam thu a sawi.

An buaina chungchang hi media lamin sawi chiam mah se inkhelh banah Conte chuan an buaina chu a tawp thu a sawi a, Mourinho chuan engmah a sawi zui duh lo thung.

A hlu thlawt
Manchester United manager Jose Mourinho chuan, "Chelsea kan hneh avangin kan hnehna chan hi a hlu tawk lo, amaherawhchu champion lai kan hneh avangin point thum kan hmuhna hi a hlu thlawt a ni. Anni hi hneh an harsa a, he point thum avangin pahnihnaah kan awm theih phah a ni," tiin an chak avanga a lawm thu a sawi.

Portuguese manager Mourinho chuan Blues innghahna Eden Hazard veng tura dah Scott McTominay chu inkhelh banah a fak. United boss chuan kum 21 mi English midfielder chuan theihna a sang tak a neih thu a sawi a, goal khung tur pawhin theihna nei mah se Blues nen erawh goal khung tur ni loin Hazard veng tura dah a nih thu a sawi a, a hna a tlin thu a sawi lang bawk.

A harsa dawn
Chelsea boss Antonio Conte chuan, "Champions League khelh phak hi a awlsam lo. He inelna khel tura kan elpui laka point kan hloh avangin a harsa lehzual dawn. England-ah chuan club parukin season tirah champion tumin kan inum a, pakhat tan chauh nomawi a awm avangin a bak zawngin Champions League khelh tumin an inbei zui a ni," tiin palina nih phak a har tur thu a sawi.

Blues hian March 4, Pathianni hian League Cup champion thar Manchester City an hmachhawn dawn a, March 15-ah Barcelona hmachhawn turin Nou Camp an tlawh dawn. Thla thara an result hi hi Antonio Conte hote hmalam hun hriltu tur a ni.