Guardiola - City-ah nomawi pakhat phawt...

Hamrik hnuhnung ber a rik rualin Pep Guardiola-a'n boruak a hnek a, lawma vangin a zuang bawk; Spanish manager hian Manchester City a enkawl hnua a nomawi hmasa ber ni turin Carabao Cup a chawi.

Pathianni zan khan Wem­bley Stadium-ah Man City hian Sergio Aguero, Vincent Kompany leh David Silva te goal hmangin Arsenal chu 3-0 in an sawp a, Arsene Wenger-a'n a vawi khat nana League Cup champion nih a tumna chu an tih thamral sak a, League Cup final-a inhnehna nasa ber a ni.

Man City hi League One club Wigan Athletic hneh loa FA Cup aṭanga an tlak hnuah, Wigan aia ṭha zawk Arsenal lakah hnehsawh takin hnehna an chang thei. Premier League hmahruaitu City hian league nomawi bakah Champions League an la beisei mek bawk.

City an mawi
Attacking football khel ṭhin pahnih inkhelah Arsenal an hlauhawm hmasa zawk, stri­ker thar Pierre-Emerick Aubameyang-a'n yard ruk leka hla aṭangin hun ṭha nei mah se keeper Claudio Bravo chuan a zawnin a dan sak thei! Bravo hi a chet ran bakah Gabon international hian a pet na tawk lo.

Chile international Bravo a langsar chhunzawm, Barcelona keeper hlui hian box chhung aṭangin Aguero tan ball a pet chhuak, Argentina international striker hian amah vengtu defender Shkodran Mustafi a paltlang hnuah David Ospina ban phak lohin mawt takin a pet kul lut.

Pep-a nauten inkhel an thunun zui a, second half-ah a chhanna an hmuh chhunzawm. Ilkay Gundogan-a ball pet chu captain Kompany chuan a tlawh pial lut a, midfielder Silva-a'n Gunners keeper Ospina dan hman loha rangin a thlawh lut bawk - minute 25 khelh hmabak la awm mah se chak tur a chiang vek tawh.

Captain rintlak
Belgium international defen­der Kompany-a'n tun hnaiah hliam a nei ngun a, a dam chhunah pawh khelna hmun a chang reng bik lem lo. Mahse, final-ah erawh Pep-a'n pound maktaduai 47.5 man John Stones aiin a ring zawk a, a tisual lo hle.

Roberto Mancini leh Manuel Pellegrini kaihhruaina hnuaia league nomawi chawi tawh Kompany hian first half-ah Arsenal striker manto ber Aubameyang nen ball hlauhawm an um dun chu buaina awm loin a chingfel thei.

Kum 31 mi Kompany hi goal venhim kawngah hotu nih a tling a, City hian ṭum danga Gunners goal nawr na tak ni ṭhin pawh harsa lo takin an dangchat thei - tun hnai season nga chhunga League Cup final vawi thum khel thei City-in a vawi nga nana champion an phu.

Arsenal an zawr
Arsenal hian League Cup final vawi riat an khelh tawhah vawi ruk an chak lo a, final an khelh hnuhnung pathumah an chak lo vek. North London club hi an goal hmasa ber an chhuah danah an tlarhnung an inrem fuh tawk lo a, Petr Cech aia luhtir Ospina awmna hmun a fuh tawk lo bawk.

Goal an chhuah hnuah Gunners hi tho chhuak tur awm angin an khel thei lo, midfield laia awm Granit Xhaka leh Jack Wilshere ten Silva leh Kevin De Bruyne te an tluk lo a, mual sir lamah Leroy Sane-a'n Hector Bellerin a chhaih mangang thei hle.

Arsenal tlarhnung pathum zinga ding ve pakhat Emma Chambers chu City hmatawng tana sut nuam tak a ni - an goal hnihna hi Chambers-a'n Silva a ven hneh loh vanga lut a ni; player dang chet theih loh zanah Mesut Ozil leh Aubameyang ten danglamna an thlen bik lo.

Premier League a parukna Arsenal hian Ningani zan dar 1:15 hian Emirates Stadium-ah City bawk hi an mikhual zui leh dawn, Weger-a nauten hnehna an chang zo lo a nih chuan palina nih phak a harsa tawh dawn - tuna nomawi an beisei neihchhun chu Europa League chiah a ni tawh.

Eng nge an sawi?
Manchester City manager Pep Guardiola chuan, "First half chhung kha chuan thil ho te te tihsual kan nei nual a, chawlhlawk hnuah erawh kan insiamṭha thei a, kan danglam ta a ni. FA Cup aṭanga tlak hnua nomawi chawi theih hi a hlu a, tunah chuan Premier League kan ngaihtuah chhunzawm ang a, Champions League quar­terfinal luh khan tum bawk ang.

"Kan champion hi ka tan a ni lo a, Manchester City tan a ni zawk," tiin an hlawhtlinna chhan chu mimal ni loin club tan a nih thu a sawi. Barcelona leh Bayern Munich manager hlui hian final a khelh hnuhnung pariatah vawi khat chiah chak loh a nei.

Arsenal manager Arsene Wenger chuan, "Hetianga kan chak lo a nih chuan zawhna tam tak a awm thei, a nihna takah chuan Premier League thununtu nen kan intawng a ni a, player ṭha tak tak awmkhawm an nih avangin team vangtlang nena inkhelh nen chuan khaikhin theih a ni lo, team ṭha an chak a ni," tiin a sawi.