Zaninah MSL4 Relegation Playoff

Mizoram Super League aṭangin team pakhat an relegate dawn. Zanin dar 8:00 hian Republic VR4 leh Mission Vengthlang Hollow ten relegation playoff an khel dawn a, best of three series hmangin MSL khel zel tur hi zawn a ni ang.

Hollow hian league round-ah hneh an nei lo a, VR4 pawh hian Mission Vengthlang chiah an hneh ve bawk. Tunah erawh an inkhelh tawhna hi a pawimawh lo a, an la khelh tur hian team pahnih hmalam hun a hril ang.

Republic VR4 hian MSL an khelh hmasak berah MSVT Hollow hi 84-70 in an sawp a, MSL kaithar hi chak phu zawk an ni.

Hemi ṭuma che ṭha veteran player Lian­hming­mawia chu VR4 tan a khel ṭha zui a, Republic Veng tlangval pahnih C. Lalchhandama leh TC Lalnunmawia te pawh an ṭangkai zui hle.

Hollow tana point 24 zet neitu Ronald Zomuanpuia chu MSL4-a point ngah ber a ni a, mimal takin khel ṭha mah se a club erawh a chak pui thei lo a, player ngai chiaha an inhmachhawn a nih chuan MSVT hi relegate zawk tura ngaih an ni.

Amaherawhchu, Hollow-in MSL4 khel tura an ziahluh Lalhmachhuana leh Lalruatfela te chhawr theih an inbeisei tawh a, ARC player pahnih an awm a nih chuan league round-a chak lo zawk hi rinkai an ni thei hial ang.

Player neih dan inang tawk an inhmachhawn dawn avangin mipui an pawimawh dawn a, Mission Vengthlang nge lian Republic Veng a hriat ang.