Harry Kane-a'n goal khung rang inti

Tottenham Hotspur striker Harry Kane chuan a beisei aia hmaa season hmasa lama a goal khung zat a khung thu a sawi - Pathianni zan khan Spurs hian khualmualah Crystal Palace chu 1-0 in an hneh a, Kane-a'n goal a khung.

English striker tan tun season-a a goal 35-na chiah a ni a, heti zat goal khung tur hian match 36 bak a mamawh lo. Kane hian season hmasaah khan goal 35 tho a khung a, match 38 a mamawh thung.

Kum 24 mi striker chuan, "Ka khel ṭha tluang tih keimah ngei pawhin ka inhria a, chumi avang tak chuan game tinah in­rin­tawkna nasa tak nen ka khelh theih phah.

"Keimah leh keimah hi ka goal khung tur zat ka intuk a, ka beisei aia hma daihin goal 35 hi ka khung a, khung zel pawh ka tum a ni," tiin a goal khungah duhtawk mai a la tum loh thu a sawi.

League match hnuhnung 13 aṭanga goal 14 khungtu striker hian Palace khelmualah goal a khung dawn lo niin a lang hman a, vawi hnih ngawt a hun ṭha neih a hlan hman.

Mahse, hun tawp nan minute hnih chiah a awm tawh tihin Christian Eriksen chuan Kane tan a siamsak a, kum 24 mi striker hian a hun ṭha neih khawhral nawn tawh loin ṭha zetin a tauh lut.

Premier League-ah ringawt pawh Kane hian goal 24 khung tawhin top scorer a ni mek a, Liverpool forward Mohamed Salah aiin goal khatin a khung tam zawk - top scorer inchuh boruak pawh a sang dawn.

Tottenham boss Mauricio Pochet­tino chuan, "Kane hian tun season-ah a khel ṭhain a hmuhnawm ṭhin takzet a, season hmasaah pawh khan tun ang bawkin a lo khel ṭha tawh. Goal khat dang a khung avangin ka lawmpui a ni," tiin a sawi.