Minerva-in Aizawl FC an ngam

Aizawl FC-in khualmualah point hlawh chhuah tumin defen­sive game khel mah se Minerva Punjab lakah goal hnih an chhuah a, goal an khung lo.

Nimin tlai inkhelah Punjab club-in hnehna an chan avangin table hmahruaitu an ni a, champion turin match hnih khelh hmabak aṭangin point li chiah an mamawh tawh.

Tau Devi Lal Stadium-a in­khel­ah first half-ah goal a lut lo a, second half-ah Akash Sangwan (51') leh Bazie Armand (90+6') ten goal hmangin Minerva lawmna an siam. Khogen Singh-a hote hian khualmualah champion lai Aizawl FC hneh lo mah se an mualah phuba lain nomawi an hnaih sawt.

Game plan ngai
Santosh Kahsyap-a'n rinlawk angin Indian Arrows an hneh ṭuma starting eleven-te chu a ring nawn a, goal venhim tuma an khelh avangin first half-ah Minerva Punjab-in inkhel an thunun.

Mizo club lamin counter attack hmangin vuak let an tum a, K. Lalṭhathanga leh Lalkhawpuimawia te hmangin an hlawhtling teuh viau a, amaherawhchu Minerva tlarhnungah defender palian Eric Dano te an din avangin an tum a hlawhtling lo.

Tihsual a pawi
Aizawl FC theihna thlirin tih­sual a thiang lo a, amaherawh­chu Mizo hlanga rem tlarhnung chu a phui bik lo a, goal luh chhana mawhphurtu erawh goalkeeper Avilash Paul a ni.

AFC keeper hian Akash Sang­wan goal khung tur dang mah se a tihper nat loh avangin Minerva winger hian minute 51-naah goal a khung tho a. Avilash Paul hian injury time-ah Kamalpreet-a free­kick a chhut sual avangin East Bengal aṭanga Minerva zawmtu Bazie Armand-a'n goal ruakah a khung.

Champion tur
Nimin result hi East Bengal leh Neroca tan hriat nuam a ni lo a, Minerva hian Chennai City leh Churchill Brothers laka point li an hmuh theih chuan an champion dawn.

East Bengal khelh hmabakah hian Shillong Lajong a la awm a, hemi zawh hian Neroca nen an match hnuhnung ber an khel dawn. Fixture thlirin Punjab club hmabak a ṭha ber.

Super Cup
Team paruk chinin playoff khelh ngai loin Super Cup an khel dawn a, Aizawl FC hian an match hnuhnung bera Gokulam Kerala an hneh chuan playoff an khelh a ngai dawn lo.

Mizo club tana chanchin lawm­awm chu Kerala club hi RG Stadium-ah an mikhual dawn a, an inkhelh hun hi March 2, Zirtawpni a ni. Parukna ni tura Aizawl FC elpui Lajong chuan East Bengal an la hmachhawn dawn a, Gokulam-in Mizo club bakah Mohun Bagan an la khelhpui ang.