Bengaluru-in Edu Garcia an hralh

Indian Super League semifinal lut tawh Bengaluru FC chuan an attacking midfielder Edu Garcia chu Chinese League One club Zhejiang Lucheng hnenah an kaltir a, Bangalore club hi Indian club zinga ram pawn club hnen aṭanga player hralhna sum dawng hmasa ber an ni–a man zat erawh tarlan a ni lo.

Kum 27 mi Garcia hian Bengaluru-ah kum khat chhung atan bak contract a nei lo a, a contract neihlai hi May thlaa tawp tur a ni. Mahse, sum tamna Chinese club an lo lang a, Garcia hian a puanthuah tela China lam pan a thlang ta a ni.

Real Zaragoza attacking midfielder hlui hian Chinese club-ah season khat chhung khel turin contract a ziak a, a season khatnaah match 15 aia tam a khel a nih chuan a contract hi pawhsei leh tur a ni ang.

Edu khelhna tur Zhejiang inlanna Chinese League One hi China rama league sang ber Chinese Super League hnuai chiaha awm club niin Sergi Barjuán enkawlna hnuaiah an khel mek–kum 46 mi manager hi Barcelona leh Atletico Madrid tana lo khel tawh niin Spain tan vawi 56 ngawt a inlan thei a, Zhejiang hma hian Barcelona (youth), Recreativo, Almeria leh Mallorca a enkawl tawh.