Dravid-a ngenna BCCI-in an pawm

ICC Cricket World Cup Under 19-a India champion puitu coach Rahul Dravid-a'n in ang khat veka Board of Control for Cricket in India (BCCI) hnena coaching staff zinga pawisa sem tura a ngenna chu pawmsak a ni.

India U19-in World Cup nomawi an chawi khan BCCI chuan coach Rahul Dravid chuan nuai 50 a dawn tur thu an puang a, player-te hnenah nuai 30 ṭheuh pein coaching staff dangte chu nuai 20 dawng turin a ti tawp.

BCCI thutluknaah Dravid a lungawi lo a, BCCI chu an lawmman sem hrut rual tura hrilhin pawisa dawn tam bik a duh lo–inhrut rualna tur a nih chuan a pawisa dawn tur pawh chu ti tlem mai turin India rama cricket thuneitu sang ber hnenah hian a thlen.

Thutlukna ang chuan Dravid bakah a coaching staff te chuan nuai 25 ṭheuh an dawng dawn a, lawmman dawng tur zingah hian World Cup-a kal ve lo, nikuma thi team trainer Rajesh Savant-a chhungte pawh an tel tawh dawn a ni.

BCCI committee member zinga mi, a hming tarlan loh chuan, "Champion vanga lawmman dawn tur puan a nih rual khan Dravid chu a lungawi lo em em a, board hnenah coaching staff zawng zawngin nomawi an chawina kawnga an thawhrim dan a in an vek thu a sawi a, BCCI chhungkuaa a tam zawk chuan ama lawmman dawn ngei pawh tih hniam a pawiti lo hi mak an ti em em a ni," a ti.

Coaching staff nuai 25 dawng turte hi bowling coach Paras Mhambrey, fielding coach Abhay Sharma, physiotherapist Yogesh Parmar, trainer Anand Date, masseur Mangesh Gaikwad leh video analyst Devraj Raut te an ni a, Dravid-a ngen angin World Cup-ah kal ve lo mah se staff pangain nuai 25 an dawng ve dawn bawk.

World Cup-a kal lo, nuai 25 dawng ve turte hi World Cup inbuatsaih nana England-a an tour ṭuma India coach W V Raman, logistics managers Manuj Sharma leh Sumeet Malahapurkar, trainer Amogh Pandit leh trainer thi ta Rajesh Savant chhunte an ni.