Atletico-in Sevilla an sawp

Manchester United-in goal an khung theih lohna Sevilla khelmualah Atletico Madrid-in harsatna an tawk ve lo–Pathianni zan khan La Liga match-ah Atletico hian 5-2 in Sevilla hi an sawp.

Atletico tan Antoine Griezmann chuan hattrick a siam a, French forward bakah hian Chelsea striker hlui Diego Costa leh Spanish midfielder Koke te chuan goal khat ve ve an khung ve bawk.

Sevilla-in minute 85 hnu lamah Pablo Sarabia leh Nolito hmangin goal hnih khung ve mah se an harhchhuah a tlai tawh–United laka goal chhuah duh lo Sevilla hian March 13-ah Old Trafford an tlawh dawn a, Atletico-in goal nga an khung thei tih hretu United-in an zuam sawt ang.

Griezmann, Costa & Koke
Inkhel ṭan aṭanga minute 29-na lekah Atletico-in goal hmahruai an khung a, goal khungtu hi Diego Costa a ni–Spain international striker hi a tluk der avanga yellow card pek a nih hnu lawkah insiamṭha nghalin goal hmahruai a khung a, Atletico a kir leh hnua a goal ngana a ni leh der tawh.

Griezmann-a'n Atletico tan a khung chhunzawm a, minute 51-naah penalty hmangin a goal hnihna a khung leh bawk–French striker hian a la duhtawk mai lo. Sevilla defender Gabriel Mercado chesualin Griezmann hnenah ball a pe a, kum 26 mi forward hian Koke tan siamsakin Spain international tan hna harsa a awm tawh lo.

Minute 81-na a ni a, Griezmann bawk a inlar–Sevilla defender ten France international hi ven lohin an dah a, tun season La Liga-a a goal 10-na ni turin a khung. Minute 85 hnua Sevilla goal hnih khung erawh mualpho zualpui khuhna chauh a ni tawh.

Beiseina nen Griezmann
Atletico Madrid-in hnehna an chan avangin hmahruaitu Barcelona chu khelh zat inangah point sarih chauhin an thlau tawh a, Antoine Griezmann chuan league nomawi chawi tura beiseina an la neih reng thu a sawi.

Griezmann chuan, "Goal hnih chhuah mah ila kan team khelh danah khan ka lawm a ni. Sevilla khan goal khung ngei tumin nasa takin min nawr a, a harsa a ni. Goal ka khung avangin ka lawm a, a pawimawh ber erawh point thum a ni.

"Kan hmaa game la awm zawng zawngah hnehna chan vek kan duh a, hna ṭha tak kan thawh avangin kan chhunzawm zel theih pawh ka beisei. Match zawng zawngah hnehna chan kan duh a, chutiang tur chuan team pumpui kan inlungrual a ni," a ti.

Griezmann faktu Simeone
Atletico coach Diego Simeone chuan, "Antoine-a'n a khel ṭha takzet a, hma a sawn zel pawh ka beisei–ani berin hma a sawn chuan team pumpuiin hma kan sawn tihna a ni tlat a ni," tiin a player pawimawh chet ṭhat ṭul zia a sawi.

Argentine coach chuan sawi zawmin, "Griezmann-a'n beisei angin season bul a ṭan lo a, chu chuan team pawh a nghawng hle. Tunah chuan a khelh dan ṭhinin a khel leh tawh a, ka hlim a ni," a ti.

Kum 47 mi manager chuan champion erawh sawi thei an la nih loh thu sawi nghalin, "Barcelona lam ngaihtuah thei kan ni lo a, Leganes kan hmachhawn hmain ni hnih leh a chanve chawlh hahdam hun kan nei. Leganes hi hriatthiam har tak, tlarhnung lam phui ṭha em em an ni a, hahdam taka hmachhawn kan duh a ni," tiin a sawi.