PSG chak zanah Neymar a hliam

Paris St-Germain chuan Ligue 1 hmahruaitu an nihna sawhnghet turin Marseille 3-0 in hneh mah se an lawm a kim lo, pound maktaduai 200 man Neymar chu a ke rek hliam vangin zawn chhuah a ngai.

Pathianni zan inkhelah PSG hian rawlthar duhawm Kylian Mbappe leh striker rinrawl Edinson Cavani te hmangin goal an khung a, Barcelona forward hlui Neymar-a cross chu Marseille defender Rolando-a'n anmahni lamah a ti lut palh bawk.

PSG leh Marseille te inkhel hi Le Classique tia sawi ṭhin a ni a, French club ropui pahnih intawn ṭuma goal khung thei naupang ber chu Kylian Mbappe a ni ta. Mbappe hi kum 19, thla hnih leh ni riata upa a ni a, 2006-a record siamtu Samir Nasri aiin ni 12-in a naupang zawk.

Paris St-Germain hian league match 27 khelh aṭanga point 71 hmuin champion lai AS Monaco aiin point 14 zetin an sang fal tawh a, Monaco lak aṭangin nomawi an chhuhsak ngei dawn niin a lang. Tun season chhungin Unai Emery naute hian an khelmualah league match 14 an khelh tawhah hnehna an la chang vek.

Neymar hliam
Khawvel player manto ber Neymar-a'n Paris club tan inelna hrang hrangah match 30 khelin goal 29 a khung tawh a, player pawimawh leh hmuhnawm ber pakhat a ni.

Marseille lakah Neymar hian goal khung lo mah se PSG tlarhnung ṭhiattu pawimawh a ni a, minute 81-naah a ke rek hliam vanga lak chhuah a ngai hi Unai Emery tan chanchin lawmawm loh tak a tling ang.

PSG hian Champions League last 16 second leh khel turin March 6 zanah Real Madrid an mikhual dawn a, champion lai Real lakah 3-1 a an tlawm tawh avangin thawhleh a awlsam dawn lo–player pawimawh ber pakhat hi a khel thei lo a nih chuan beiseina a tlem zual dawn.

Spanish manager Emery chuan, "Neymar inhliam kha a nasat loh hram kan beisei, endik nawn a ni leh dawn a, a chawlh rei loh hram kan beisei a ni," tiin Neymar chuan Real Madrid hmachhawn thei hram se a duh thu a sawi.

Tun season inelna hrang hranga goal 30 khung tawh Cavani chuan Neymar hliam chu a nasa loa a hriat thu a lo sawi ve bawk. Uruguay international striker chuan, "Ke rek hliam hi chu kan tawng fo a, a rawn kir thuai ang. A chawl a nih pawhin match khat bak a nih loh kan beisei," tiin a sawi.