Rohit Sharma hoin India feh chhuak dawn

India chuan March 6 aṭanga khelh ṭan turin Twenty20 tri series 2018 Nidahas Trophy an hmachhawn dawn a, he series-a captain tur hian Rohit Sharma chu puan a ni.

Kum 30 mi batsman hian T20 series South Africa-a an khelh zawh taka India match hnuhnung berah captain mawhphurhna a la a, December khan Sri Lanka-a an zinchhuah ṭumin T20 leh ODI series-ah India captain ni bawkin hnehna a lo chanpui ve ve tawh bawk.

Men in Blue tan match an neih ngah avanga lo phunnawi tawh India captain Virat Kohli chu wicketkeeper MS Dhoni, allrounder Hardik Pandya, fast bowler pahnih Bhuvneshwar Kumar, Jasprit Bumrah leh spin bowler Kuldeep Yadav te nen chawlh hahdamna hun pek an ni.

India squad-ah hian Baroda batsman Deepak Hooda, Hyderabad fast bowler Mohammed Siraj leh Delhi wicketkeeper batsman Rishabh Pant-te chu South Africa-a zin zo hlim zinga tel lo koh thar an ni thung.

Nidahas Trophy-ah hian India bakah inelna thlengtu Sri Lanka leh Bangladesh an tel dawn a, ram pathum hi vawi hnih ṭheuh an inkhelh kual hnuah a sang pahnihin March 16-ah final an khel ang.

India Squad: Rohit Sharma (Capt), Shikhar Dhawan (vc), KL Rahul, Suresh Raina, Manish Pandey, Dinesh Karthik (wk), Deepak Hooda, Washington Sundar, Yuzvendra Chahal, Axar Patel, Vijay Shankar, Shardul Thakur, Jaydev Unadkat, Mohammad Siraj, Rishabh Pant (wk).