Zaninah Spurs Vs Rochdale
Zanin dar 1:35 hian Tottenham Hotspur leh Rochdale ten FA Cup fifth round replay an khel dawn.
League One club khelmual Spotland Stadium-ah team pahnih hi 2-2 in an inhnehtawk tawh a, zaninah quarterfinal khel tur a hriat ang.
FA Cup leh Upset
FA Cup-ah eng pawh a thleng thei, champion lai Arsenal pawh an tla tawh. Gunners hian Nottingham Forest chu third round-ah an hneh lo nghal a, he round hi Premier League club inlan ṭanna a nih avangin London club hi an vawi khat khelhnaah an tla nghal tihna a ni.
League Cup-a Arsenal sawptu Manchester City pawhin quarterfinal an thleng pha bik lo a, Pep Guardiola hote hian League One club Wigan Athletic chu 1-0 in an hneh lo.
Premier League leh Champions League lama che ṭha chho mek Liverpool pawhin fifth round an thleng lo. Reds hian fourth round-ah West Bromwich Albion an hneh lo a, Jurgen Klopp-a hote chak lohna hi Anfield a ni.
Wembley pawh ni se
Rochdale len luhna tur hi Wembley Stadium a ni a, Tottenham Hotspur-in England national stadium an hman ṭantirh hian harsatna tawk mah se tunah chuan an hmang thiam tawh. League One club tan hnehna chan a harsa dawn nachungin beseina nei chungin an lenglut dawn.
Rochdale manager Keith Hill chuan, "Wembley Stadium a hnehna chan chu mumang ram ang mai a ni dawn a, amaherawhchu kan beisei ṭhin chu cup final a ni. Tun season-ah erawh Tottenham khelmual a ni a, a chhehvelah kan buai a thiang lo, chak tumin kan rilru kan pe tur a ni," tiin inti hlim turin Wembley an tlawh loh tur thu a sawi.
Tun dinhmunah Rochdale hi an awmna league-ah 24-naah an awm a, table mawngphah aṭanga relegation zone chhuahsan turin point 11 tal an mamawh a, chutih rualin 21-naa awm Oldham aiin match thumin an khel tlem thung.
Keith Hill chuan, "Wembley khelmual a ṭhat avangin team ṭha lo zawk tan chuan chak a harsa lehzual dawn a, kan player-te hian an tana hun ṭha hi bawhpelh lo se ka duh. Anmahni infiahna tur ni loin chak kan tum dawn a, hnehna kan chan theih chuan hlawhtlinna ropui tak a ni ngei ang," tiin league lama che chhe mah se quarterfinal an thlen theih thu a sawi.
Spurs lam hi
Tottenham manager Mauricio Pochettino tan FA Cup hi ngaihthah theih a ni lo a, Argentine manager hnuaiah Spurs-in nomawi an la chawi lo a, Poch hian manager a nih hnuah nomawi a la chawi lo hrim hrim.
London club hian Jan Vertonghen chu training-naah a inhliam avangin Crystal Palace an hneh ṭumin an chhawr thei lo a, Belgian defender a awm loh avangin defensive midfield-a chhawr ṭhin Eric Dier chu pawh let a ni.
Pochettino hian March 7 zana Juventus an mikhual tur an thlir tel a ngai a, chuvangin kum 20 mi Juan Foyth chu tlarhnungah an hmang a nih pawhin a mak lo ang. Argentine defender Foyth hian tun season tir khan Spurs hi a zawm a, FA Cup-ah vawi thum inlan tawhin Rochdale nen an inkhelh hmasak ṭum pawh hian bul a ṭan a ni.
Zanin Inkhel Tur
1:35 PM Tottenham Vs Rochdale
Quarterfinal Fixtures
March 17, Inrinni
8:30 PM Sheffield Wed/Swansea Vs Rochdale / Tottenham
8:30 PM Wigan Athletic Vs Southampton
1:15 AM Manchester United Vs Brighton
March 18, Pathianni
10:00 PM Leicester City Vs Chelsea