Rinkai zingah kan tel lo - Ronaldo

Cristiano Ronaldo chuan FIFA World Cup chawi tura rinkai zingah Portugal an tel loh thu a sawi a, Brazil leh Spain te chu champion tura rinkai an nih thu a sawi bawk.

Portugal hian an group match hma­sa berah Spain an hmachhawn dawn a, chumi hnuah Morocco leh Iran te an tum zui leh dawn; Group B aṭanga tlang thei tura ngaih an ni.

Kum 33 mi Ronaldo chuan, "Rinkai kan ni lo, kan nihna hi kan inpawm thiam tur a ni. Keini aia team ṭha zawk an awm - Brazil, Spain, Germany leh Argentina te hi team ṭha an ni.

"Chutih rualin football-ah chuang eng pawh thleng thei a ni a, a hmasa ber atan chuan group stage paltlang kan tum ang, chumi hnu lam chu sawi lawk theih a ni lo," tiin a sawi.

Real Madrid forward chuan Portugal tana a inlan thei chu a inchhuan thu sawi zuiin, "Kan ram team-ah hian Rui Costa, Fernando Couto, Luis Figo leh Deco te an khel tawh ṭhin a, anni nena ram khata kan awm ho hi a lawmawm, an sulhnu ropui tak takte kan hre reng ang," a ti.

Portugal hi FIFA World Cup-ah an la champion ngai lo, mahse 2016 European Championship-ah khan Ronaldo hoin an champion. Ballon d'Or chawimawina vawi nga dawng tawh Ronaldo hian player ṭha bik a nih zia fiah nan World Cup chawi kher a mamawh tawh loa a hriat thu a sawi bawk.

Ronaldo chuan, "World Cup cham­pion i duh em tia min zawt a nih chuan, tehreng mai tiin ka chhang ang che. Mahse, tuna ka thlen chinah pawh hian ka lawm a, chawl tawh pawh ni ila chhuang takin ka kalsan tawh ang," a ti.