Real hmachhawn lo tur Neymar

Paris St-Germain forward Neymar chuan hliam vangin Real Madrid an hmachhawn hunah a inlan ve thei dawn lo. French champion hian February 6 zan hian Champions League last 16 second leg-ah Real an mikhual dawn.

Pathianni khan PSG chuan Ligue 1 inkhelah Mar­seille chu 3-0 in an hneh a, amaherawhchu minute 81-naah hliam vangin lakchhuah a ni. Brazil captain hian hliam a tuar chiah hian khelmualah bawkin na tuarin a rum a, club thu chhuak chuan a ke dinglam ngalrek a bilh bakah kephah chung ruh a khik thu an tichiang.

French club hian Brazil captain chawlh hun tur hi tichiang lo mah se Real Ma­drid a hmachhawn theih a rinawm loh. PSG hian Santiago Bernabeu-ah 3-1 zeta Spanish club hi an hneh tawh loh avang­in hmabak a harsa sawt ang.

Pound maktaduai 200 man Neymar hian August thla khan French club hi zawmin match 30-ah goal 29 a khung tawh. Ligue 1-ah PGS hi hmahruaitu an ni a, anmahni hnaih bertu Monaco aiin point 14-in an sang zawk.

Zanin dar 1:30 hian French Cup quarterfinal khelh a ni dawn a, PSG-in kartawpa 3-0 ngawta an hneh Marseille chu Neymar-a tel loin an hma­chhawn ang.