Wenger hun a liam tawh - Ian Wright

Arsenal striker hlui Ian Wright chuan Arsene Wenger-a'n Emirates Stadium-ah hna thawk chhunzawm zel tawh lo se a duh thu a sawi a, Gunners neitu Stan Kroenke chu club ngaihsak lo tiin a sawisel bawk.

North London club hian kum 2018 bikah match 12 kel tawhin vawi ruk an chak lo a, an match hnuhnung berah Manchester City chu 3-0 in an ngam lo. Premier League hmahruaitu City an phak lohna hi point 27 zet a nih bawk avangin club ṭha tia inchhal tan chuan zahna tham a tling.

Gunners tan match 288 a khelh aṭanga goal 185 khungtu Ian Wright chuan, "Wenger hian chhuanlam a nei a, team hi an ṭha tawk lo chung pawhin a chhan lutuk a ni," tiin Arsenal manager chu player nei ṭha lo chung pawha lungawi lui tlatah a puh.

Wright hian a club hlui hi tum hma lama an ropuina ang nei let leh tur chuan kawng thui tak zawh an la ngaih thu a sawi a, player langsar lalut turin a duh bawk. Wright chuan, "Thinlunga lawm veng vengna khawp player lak a ngai," tiin a ṭha satliah ni loin, a ṭha fal bik lalut se a duh thu a sawi bawk.

Kum 68 mi Wenger hian nikum nipui lai khan kum hnih daih contract a ziak thar a, a hun neih sa hi a hmang zo dawn nge dawn lo a chiang lo. Result ṭha an neih miau loh avangin amah ṭan em em ṭhintu supporter zingah pawhin bang tura duhtu an tam ta hle.

French manager thlak tur hian Carlo Ancelotti, Maurizio Sarri, Leonardo Jardim leh Joachim Low te hming sawi rik a ni ta zeuh zeuh a, mahse Wenger hi a bang a nih ngawt loh chuan Gunners neitu lam chuan manager thlak tumna an la nei rih lem lo niin a lang.

Manager thar chungchang sawiin Wright chuan, "Club hian hmasawn turin thil thar a mamawh, kum upa leh hmanlai thil lam tupui ai chuan tunlai mila player khelhtir thiam a ngai, chutiang tur chuan Mauricio Pochettino ang hi an ṭha," tiin Tottenham manager chu a awh thu a sawi.

Arsenal-a 66.6% zet neitu nihna changtu Kroenke chungchang sawi zuiin Wright chuan, "Club neitu hian thil kal dan a ngaihtuah tawk lo a ni, ngaihtuah ni sela chuan Wenger khan kum hnih daih contract a ziak lo ang," tiin a sawi bawk.