Kane, Salah, Aguero, Sterling Tu nge pawimawh ber?

Tun season Premier League-ah player langsar zual pali an awm a, Tottenham Hotspur striker Harry Kane, Liverpool forward Mohamed Salah, Manchester City forward pahnih Sergio Aguero leh Raheem Sterling te an ni.

Harry Kane-a'n tun season Premier League-ah goal 24 khung tawhin top scorer a ni mek a, amah hnaih bertu Salah-a'n goal khata phak loin goal 23 a khung tawh. Aguero-a'n goal 21 khung tawhin Argentine striker a la thiam reng a, Raheem Sterling-a'n goal 15 a khung tawh bawk.

Goal khung tam aṭanga teh chuan goal 13 chauh la khungtu Manchester United striker Romelu Lukaku te ang tan Aguero te dinna tlara din ve ngawt a ngam awm loh a, an goal khungin team tana point a hlawhchhuah zat chhut erawh chuan Belgian striker hi Aguero laka inthlahrung tur niin a lang si lo.

Khai mah aw...
Aguero-a'n City tan goal 21 a khung tawh a, Argentine striker goal khung avanga City-in point an hlawhchhuah zat erawh point sarih chiah a ni–chumi awmzia chu Atletico Madrid striker hluiin an khingpui team lakah an tlawm dawn emaw draw result an hlawh chhuak dawn nia a lan laiin goal a khung tlem tihna a ni.

Kum 29 mi striker hian Newcastle United laka 3-1 a hnehna an chan ṭumin goal zawng zawng a khung vek a, Leicester City 5-1 a an sawp ṭuma goal li chu a khung niin a goal khung tam zawk hi an chak dawn chiang tih hriatna inkhela lut a ni tlangpui–entirnan West Brom laka 3-0 a hnehna an chana an goal thumna kha a khung a ni a, Swansea City laka 4-0 a an chak ṭuma goal lina kha ama khung a ni.

Aguero-a'n goal 21 a khung aṭanga a team tana point a hlawhchhuah sak zat chu point sarih a ni–hemi awmzia chu Baggies laka 3-0 a hnehna an chan khan an goal thumna kha khung lo pawh ni se City-in hnehna an chang dawn tho tih a chiang tawh a, hemi ṭuma a goal khung hian point a keng tel lo.

Tlem si hlu si
Lukaku-a'n United tan goal 13 chiah khung mah se Aguero-a'n City tana goal 21 hmanga point sarih a hlawhchhuah aiin Red Devils tan a hlawh chhuak hnem zawk a, a team tan point riat a hlawh chhuak–Lukaku awm lo ta se United point hmuh zat chu point riatin a kiam dawn tihna a ni a, Jose Mourinho naute dinhmun a duhawm lo hle ang.

Everton forward Oumar Niasse leh Liverpool winger Sadio Mane ten goal sarih ve ve chiah khung mah se an goal khung hunin a zir miau avangin Aguero point hlawhchhuah zat point sarih tho an team tan an hlawh chhuak–tuna Liverpool dinhmun hi Mane goal sarih 'lekin' a lo hril thui hle tihna a ni.

Raheem Sterling-a'n goal 15 a khung tawh a, City tana a khelhpui Aguero chu goal ruk ngawtin a la phak lo–team tana goal khung hlut lamah erawh English forward goal khung a hlu zawk a, team tan point 11 a hlawh chhuak–City tana Aguero leh Sterling point hlawhchhuah zat belhkhawm hi point 18 a ni a, anni pahnih awm lo se chu City hian fal takin Premier League-ah hma an hruai kher lo ang.

Kane & Salah
Premier League player zingah tun season-a 'hot' bera chhal ngam chu Kane leh Salah an ni–player pahnihin an team tan goal an khung hnem a, goal an khung hnem tluk zetin team tan point an hlawh chhuak hnem. Kane-a'n goal 24 hmangin a team tan point 14 a hlawh chhuak a, Salah-a'n goal 23-in point 13 a hlawh chhuak thung.

Kane-a'n Spurs tana goal 24 a khung zawng hi thaibo ta ila London club hi point 14 ngawtin tun dinhmun aiin an hniam dawn tihna a ni a, Champions League khelh phak pawh sawi ngam lo tur an ni! Salah-a goal 23 la bo ta ila Liverpool-in point 13 an hloh dawn tihna a ni a, Merseyside club tana 'Egyptian King' hlutzia hi sawifiah chi a ni lo.

England international Kane-a goal khung 24 thlirletin a pawimawh hlawm hle–Arsenal leh Crystal Palace lakah chakna goal a khung a, Liverpool, West Brom leh Southampton lakah 'draw'-na goal a khung bawk.

Salah & vei pet
Mohamed Salah-a'n Liverpool kawr ha chunga a zawna match ruk goal a khungna ni tura West Ham lama goal a khung khan Reds legend record thaichhiat sakin Premier League record thar a siam–a ke vei lam hmanga league goal 20 a khungna chiah a ni a, Premier League-ah ke vei lam hmanga season khata heti zat goal khung thei an la awm ngai lo.

1994-95 season khan Liverpool legend Robbie Fowler chuan a ke veilamin goal 19 ngawt a lo khung tawh a, Merseyside club hi palina a nihpui–Fowler record Salah-a'n a khum a, tuna zawhna awm chu Egyptian forward hian Fowler aiin Liverpool a thlen sanpui thei zawk dawn em tih hi a ni.

Premier League-in ke vei lam hmang thiam zawk player langsar tak tak a lo hmu tawh ṭhin–Robin van Persie-a'n 2012-13 season-ah a ke vei lam hmangin goal 18 a khung a, United a champion pui. "Liverpool tan league nomawi chawi ka duh," titu Salah tan tun season-ah Liverpool champion pui a beiseiawm tawh lo a, engtikah nge RVP hnung a zui ang tih hi zawhna dang a ni. Hunin a chhanna a la pe ang.