TOISA 2018 Sportsperson of the Year-ah Srikanth

Khawvel chanchinbu lar The Times of India-in kumtina a sem ṭhin Times of India Sports Awards (TOISA) 2018 semchhuahna neih a ni a, Indian shuttler Kidambi Srikanth hnenah award ngaihhlut ber Sportsperson of the Year chawimawina hi pek a ni.

Kidambi Srikanth hian he chawimawina dawng tur hian amah ang thoa shuttler PV Sindhu, India football captain Sunil Chhetri, cricketer langsar Virat Kohli, India hmeichhe cricket team captain Mithali Raj, shooter Ankur Mittal leh India hmeichhe hockey team defender Gurjit Kaur te a khum.

Mizo rawlthar weightlifter Jeremy Lalrinnunga chu Weightlifter of the Year chawimawina dawng thei tur zingah chhawpchhuah ni mah se tun hnaia National Youth (sub junior) inelnaa national record siamtu rawlthar hian 2017 World Weightlifting Championships Women's 548 kg-a gold latu Saikhom Mirabai Chanu a tluk pha lo.

Tu nge Srikanth?
Kum 25 mi shuttler hi Sportsperson of the Year chawimawina dawng turin 2017-a a zinkawng a ngaihnawm hle. Indian mipa shuttler zinga a hmasa ber ni turin Indonesia Open nomawi a chawi a, a karleh lawkah Olympic champion Chen Long hnehin Australia Open a champion leh bawk.

Andhra Pradesh tlangval hian a zawna nomawi a chawi hian Indian badminton player zinga a zawna Super Series champion thei hmasa ber a ni nghal a, 2017-ah vek hian Denmark Open-ah champion-in Indian player zingah Prakash Padukone dawta he nomawi chawi thei hmasa ber a ni lehnghal a, French Open-ah a champion zui.

Srikanth hian Singapore Open leh National Badminton Championship-ah final a lut bawk a, Badminton World Championship-ah erawh quarterfinal bak a tlin lo. Indian legend Pullela Gopichand enkawlna hnuaia inzir Srikanth hian 2017-ah Super Series nomawi pali chawiin kum khata Super Series nomawi chawi thei pali zingah a hming a ziak lut–badminton legend Lee Chong Wei, Lin Dan leh Chen Long te nen tlarkhatah an awm.

Chawimawina dang
Chawimawina langsar dang zingah Mizoram Super League season 3-a Tuikual South tana khel Amyjot Singh Gill chu Basketball Player of the Year-ah thlan a ni a, Bengaluru FC goalkeeper Gurpeet Singh Sandhu chu Footballer of the Year-ah thlan niin Jasprit Bumrah chu Cricketer of the Year a ni.

Rohan Bopanna-a'n a vawi khat nan Grand Slam nomawi chawiin French Open mixed doubles-ah a champion a, Tennis Player of the Year-ah thlan a ni. 2017 Asia Cup-ah an champion avangin India mipa hockey team chu Team of the Year-ah thlan an ni a, kumin aṭanga a vawi khat nana sem Inspiration of the Year chawimawina chu ICC Women's World Cup final lut India hmeichhe cricket team pek an ni bawk.

Nikuma TOISA Awards sem a nih ṭumin Mizo tlangval Jeje Lalpekhlua chu Footballer of the Year-ah thlan a ni a, Hnahthial tlangval hnuah Jeremy hming lang ve leh mah se Jeje hnung erawh a la zui thei lo. Kumin TOISA Awards-ah hian India tan Olympic-a shooting gold medal la tawh Abhinav Bindra, football legend Bhaichung Bhutia, Indian paralympian zinga Paralympic gold medal pahnih la thei hmasa ber Devendra Jhajharia, Indian hmeichhe athlete langsar Reeth Abraham, Indian cricketer lar Gautam Gambhir leh Times Internet Ltd. chief editor Rajesh Kalra-te chu jury an ni.