Europe-ah Sevilla tan hmun a awm em?

Europa League-a vawi nga champion tawh Sevilla-in zanin dar 12:00 hian Malaga an lenchilh dawn. Vincenzo Montella hote hian an match hnuhnung berah Atletico Madrid 5-2 a an hneh loh avangin insiamṭhat an mamawh hle.

Sevillistas hi league-ah paruknaah an awm mek a, season thara Champions League khel tur chuan chetsual a thiang tawh lo. Spanish team hian Manchester United chu an mualah goal chhuah loin an chelh thei a, Old Trafford-a zin hmabak an ni.

Goal nga a tam
Jose Mourinho hote chelh thei Sevilla-in Diego Simeone kaihhruai team an hmachhawn ṭumin starting eleven ngai chiah hmang mah se goal nga an chhuah. Atletico hian January thla aṭangin Diego Costa chhawr thei a, Spain international striker awm hnuah team dang daih an ni.

Amaherawhchu, Champions League khelpha team tan goal nga chhuah hi mualphona a ni a, Chelsea striker hlui Costa awm hi Sevilla tan chhuanlam tling a ni lo.

Sevilla coach Vincenzo Montella chuan, "Goal hnih kan chhuah khan kan tlawm a ni. Zan lungchhiathlak a ni a, insiamṭhat kan mamawh. Kan team anga hmabak nei êng tak tan chuan inrintawkna hloh a thiang lo," tiin inthlah dul thei an la nih loh thu a sawi.

Sevillistas hian Atletico hma hian February thla tir khan Eibar an hmachhawn ṭumin goal nga an chhuah tawh a, 5-1 in an chak lo. Italian manager chuan, "Kan khelh dan ka la thlak dawn chuang lo a, amaherawhchu goal kan khung erawh a ṭul a ni. Mimal tihsual vangin kan khingpui kha goal chance ṭum thum lai kan siam a ni," tiin an khelh dan ngai an la chhawm nun zel tur thu a sawi.

Sevilla tan inrintawkna nei turin zanina Andalusian derby-ah hnehna chan a pawimawh ang.

Europe chu...
Montella hote hian Copa del Rey final an thleng tawh a, April 21 zana Barcelona nen nomawi an inchuh huna an chak a nih chuan season tharah an ropui tawhna Europa League an khel thei ang.

An chak pha ta a nih pawhin Europa League khelhna kawng a inhawng zau dawn tho a, Barcelona-in Champions League an khelh nawn dawn avangin La Liga pasarihna thlengin Europa League an khel pha dawn a, paruknaa awm mek Sevilla tan a harsat a rinawm loh.

Champions League khelh nawn erawh a harsa dawn a, Sevilla hian palinaa awm Valencia point 10 in an la pha lo. Europe inelna sang bera champion tan inelna hi a khelh nawn theih bawk a, hei erawh La Liga palina nih phak aiin a khirh zawk.

Sevilla hian Malaga zawhah Athletic Bilbao leh Valencia an hmachhawn leh ang a, chumi zawh chuan Old Trafford-ah March 13 zanah an lenglut ang.

Inkhel dang
Atletico Madrid-in zanin dar 2:00 hian Valencia an mikhual dawn a, Diego Simeone hote hian pakhatna Barcelona chu point sarih chauhin an pha tawh lo.

Catalan club hian naktuk zan hian Las Palmas an tlawh ve thung dawn a ni.