I League aia ISL dah sangtu Westwood

ATK coach Ashley Westwood chuan Indian football-a league pahnih I League leh Indian Super League-ah league hlutna sang leh inelna hautak zawk sawi harsa a tih thu a sawi rualin ISL chu tlema a dah san zawk thu a sawi.

Kolkata club-in Teddy Sheringham an ban hnua season tawp thleng atana an coach lailawk Ashley Westwood chuan, "I League leh ISL khaikhin chu thil harsa tak a ni. India-a ka lokal khan league pakhat chauh a la awm a, sawi kan tum ṭalh a nih erawh chuan ISL hi tlemin a sang zawk.

"Season tawpah Super Cup khelh a ni dawn a, hei hian khawi league nge ṭha zawk chu a chhang mai turah ka ngai. ISL-a ram pawn player leh Indian player kan neihte thlir ila, television lam coverage leh fans thlenga chhut erawh chuan ka ngaihdanah ISL hi a sang zawk a ni," a ti.

Bengaluru a enkawl laia I League nomawi vawi hnih chawitu coach chuan sawi zawmin, "ISL ka dah san zawk thu ka sawi rual hian I League hlutna a nep tihna a ni lo. ISL player draft-ah khan player 50 vel chu leitu nei loin an awm a, I League hi awm hlauh lo se chuan khang mite khan club an nei dawn lo tihna a ni. ISL leh I League hi Indian football tan an hlu ve ve a ni," tiin a sawi.

ATK hian zanin dar 8:00-ah inkhel hmachhawn tur an nei dawn a, an mikhualna ramah FC Goa chu an lenchilh ang.