Match 10 chak zawn thei Napoli

Napoli chuan a zawnin Serie A match 10 chhung hnehna an chang ta, Maurizio Sarri naute hian Thawhṭan zan khan an mikhualna ramah Cagliari chu 5-0 ngawtin an va luhchhuah a, point 69 hmuin champion lai Juventus aiin point liin an sang zawk–Juve hian match khatin an la khel tlem zawk thung.

Sardegna Arena-a inkhelah Napoli hian player panga–Jose Callejon, Dries Mertens, Marek Hamsik, Lorenzo Insigne leh Mario Rui te hmangin a khat mawi tawkin goal an inkhung chhawk, harsa lo takin hnehna an chang.

Napoli-in Serie A nomawi an chawi hnuhnun ber chu 1990 kha a ni a, khatih hunlaia an thiampuipa chu Diego Maradona a ni. Nomawi an chawi ṭuma nau piang te pawh puitling an ni vek tawh tihna a ni, a zawna vawi ruk champion tawh Juve lak aṭangin nomawi chhuhsak an tum ruh hle.

Italian manager Maurizio Sarri kaihhruaina hnuaiah Napoli hi Champions League hnuah Europa League aṭanga pet chhuah leh ni bawk mah se league bikah chuan an kaltluang hle. Nikum December thla khan Juventus an hneh lo a, hei bak chu season kal laiah tlawm an la nei lo.

Sarri naute hian an match leh pekah AS Roma leh Inter Milan an hmachhawn chhunzawm dawn a, an tan fiahna hautak a ni ang; an paltlang thei a nih erawh chuan an tum ram thleng turin kawng a awlsam sawt tawh dawn thung a ni.

Kum 59 mi Sarri chuan, "Kan khel ṭha tluang a, hnehna kan chan bakah football hmuhnawm tak kan khel thei. Juventus ṭantute chuan champion tur ang hrimin min sawi el vel pawh a ni thei, kan buai phah tur a ni lo ang. Kan tumah kan chiang a, nomawi chawi chu sawi thei rih lo mah ila point 100 hmuh tlin kan tum ang, harsa tak angin lang mah se thil tih theih a ni," tiin a sawi.

Serie A-ah match khelh hmabak 12 a la awm a, point hmuh belh theih zat chu 36 a ni. Napoli hian point 69 an nei tawh a, point 100 hmu tling tur chuan point 31 hmuh belh an la ngai a ni.