Arsenal mikhual tur Chelsea

Premier League club thawm na pahnih, an thawm nat dan inang lo Arsenal leh Chelsea te chu Pathianni zan dar 9:00 hian Emirates Stadium-ah an intawng dawn - tun kartawp inkhel hmuhnawm ber tura ngaih a ni.

Champions League champion lai Blues hian league-ah bul an ṭan fuh a, striker man tam Romelu Lukaku an lakluh bawk avangin an thawm a na hle - Gunners pawh an thawm a na. Mahse, an thawm nat dan hi kai thar Brentford an ngam loh vanga 'lungawi lo phun' thawm a ni thung!

Anmahni muala khel tur ni mah se Mikel Arteta naute hi rinkai lo zawk an ni. Mahse, Spanish manager hian season hmasa khan league-ah Chelsea hi vawi hnih a hneh; Frank Lampard (3-1) leh Thomas Tuchel (1-0) enkawlna hnuaiah a ngam ve ve a, tunah a hlau thar thut lo ang.

Arsenal boruak
Pierre-Emerick Aubameyang leh Alexandre Lacazette te chu hri leng an kai avangin an la khel thei dawn lo a, hliam vangin Thomas Partey pawh a la inlan lo ang. Nimin lama an ziah luh fel Martin Odegaard tan inkhel turin a la hma mah mah bawk.

Arsenal hian tlarhma lamah Folarin Balogun leh Gabriel Martinelli te an chhawr a ngai leh dawn, an innghahna tur tak erawh Emile Smith Rowe a ni ang. English midfielder hian Tuchel-a enkawl Blues an hmachhawn hnuhnung berin goal awmchhun a khung.

Kum 21 mi Smith Rowe hian Brenford lakah a khel chhe lo, mahse a team a chakpui lo. A lakah beiseina an neih san tak hi ball pass thiam hmingthang leh Euro 2020 champion ni bawk Jorginho lakah eng ang taka ṭha nge a nih tih fiah a ni dawn.

Bukayo Saka-a'n bul a ṭan tawh a rinawm a, ani a lut a nih chuan Balogun dah chhuakin Nicolas Pepe a awm thung mai thei. England international Saka hian a khel a nih chuan Marcos Alonso a hmachhawn a ngai ang, hna a awlsam lo khawp ang.

Arsenal hian tlarhnung laiah player thar Ben White an chhawr nawn a rinawm. Pound maktaduai 50 man defender hi Brentford lakah khan Pablo Mari nen an inkawp a, tawnhriat nei Rob Holding-a'n a tu emaw zawk hi a thlak mai thei bawk.

Chelsea boruak
"Tun hma zawng aia ṭha zawkin ka lo kir, Italy-ah khan player ṭha leh hriam zawkah ka in chher chhuak," tiin Romelu Lukaku-a'n a sawi. Chelsea, Everton leh Manchester United tana a khelh hmasak lai ai khan inrintawkna a nei sang zual tawh tih a chiang.

Tuchel-a'n player duhthlan tur a ngah a, Belgium international hi minute 90 chhung a chhawr nghal chu a la rinawm lo. Chutih rualin tlarhma lama rinrawl Timo Werner-a'n goal ala khung theih loh avangin Inter Milan aṭanga an lakluh hi an mamawhna a sang hle.

An match hmasa bera Crystal Palace an hneh ṭumin Kai Havertz chu bench-ah dah a ni a, German international hian bul a ṭan tawh a rinawm; tlarhnung phui lo Gunners tan hmachhawn a châkawm lo khawp ang - a sira khel turin Mason Mount leh Christian Pulisic an la nei bawk.

German manager Tuchel-a'n Palace lakah khan N'Golo Kante pawh a la khek, France international hian training zawm pangngai tawh mah se a la dim deuh mai thei - match khelh hmabak hautak an neih chhoh dawn avangin a chhawr hmanhmawh lo ang.

Season hmasa a vawi hnih an ngam loh Arsenal lakah Chelsea hian phuba lak ngei an duh dawn, phuba la tur chuan tun aia hun ṭha hi a awm theih tawh chuang lo ang - khualmualah sa huai ser chunga point thum hlawh chhuah ngei an tum dawn.

Chak loh hnua insiamṭhat dan ṭha ber chu hnehna chan leh a ni. Hnehna chan chuan boruak danglam leh ṭha zawk kan siam ṭhin, ṭha taka kan khelh theih nan theihtawp kan chhuah dawn, chu chuan result ṭha a ken tel ka beisei. "Chelsea hi European champion an ni a, manager ṭha takin world class player awmkhawm a enkawl an ni. Team ṭha an nih avangin inkhel hautak a ni dawn, mahse chak theih kan inbeisei,"
- Mikel Arteta, Arsenal Manager