Nadal tan season a tawp

Rafael Nadal chu tun season chhungin a inkhel thei tawh dawn lo. Spanish tlangval hian a ke hliam vangin kumin chhunga a inkhelh theih tawh loh tur thu a sawi a, Grand Slam hnuhnung ber US Open-ah a hmel kan hmu ve dawn ta lo tihna a ni.

Grand Slam vawi 20 champion tawh hi kumin French Open aṭanga a tlak hnuah ngai a la awh leh lo. Grass court inelna lian Wimbledon leh Tokyo 2020 aṭangin a inhnukdawk a, lo kir leh mai tura beisei a nih laiin a chawlh a ngai rei dawn ta zawk.

US Open aṭangin champion lai Dominic Thiem leh Roger Federer te chu hliam vang bawkin an inhnukdawk tawh bawk a, tunah Nadal a inlan thei dawn lo tih a chian leh tak avangin player ṭha an tel kim dawn lo hle.

Kum 35 mi Nadal chuan, "Ka beisei aiin ka ke hliam hian hun a duh rei tlat a, chuvangin ka chawlh rih a ngai," tiin a sawi. Vawi li a champion tawhna US Open khelh loh hi Nadal tan channa lian tak a ni ang.

Grand Slam title lak hnem lamah Federer, Nadal leh Novak Djokovic te an in rual mek. New York khawpuiah Djokovic hi a champion thei a nih chuan a major title 21-na a ni dawn a, tennis mipa singles huanga major title la hnem ber dinhmun a chelh thei dawn.