Serie A 2021-22 season an ṭan dawn : Juve, Inter leh Milan bakah Roma thawm a lian

Italian Serie A 2021-22 season chu zanin aṭangin khelh ṭan a ni dawn, champion lai Inter Milan chuan dar 10:00 hian San Siro-ah Genoa an lo mikhual dawn a, season hmasa lama nomawi chawi puitu Antonio Conte awm loh hnua an league match hmasa ber a ni ang.

Cristiano Ronaldo awmna Juventus chu Pathianni zanah an inlan dawn. Old Lady hi Udinese mualah an lenglut ang, manager thar Massimiliano Allegri-a'n tun hma lama a ropui tawhna ang kha a nei leh thei dawn em tih chu kan hmu dawn.

Manager thawmna Jose Mourinho kaihhruai AS Roma leh Fiorentina inkhel a hmuhnawm nghal dawn a, champion beisei phak ve zinga mi AC Milan chu club lian zinga inlan tlai ber tur niin Thawhṭanni zanah bul an ṭan ve chauh ang.

Lukaku tel lo
Antonio Conte-a'n huaisen taka team dinin Juventus rorelna a ṭhiat a, mahse Inter Milan hi sum lama an talbuai miau avangin dahsan an harsa. Chinese sumdawng hausa hnuaia awm club hian an player ṭha Romelu Lukaku leh Achraf Hakimi te an chelh theih lo.

Belgium international striker Lukaku hian chhuah a duh loh thu a sawi a, mahse a chhuah tho avangin Inter dinhmun ṭhat tawk lohzia a ti lang chiang. Senior player Arturo Vidal, Aleksandar Kolarov leh Radja Nainggolan te an chhuak fel bawk.

Nerazzurri manager thar Simone Inzaghi tan hna a awlsam dawn lo, an midfielder ball thiam Christian Eriksen pawh hriselna dinhmun ṭha lo vangin an chhawr thei tawh dawn lo, team thar hlak din tur ang hial a ni ang.

Player ṭha chhuak mah se Lautaro Martinez an la nei a, goal hmaah chuan an la hlauhawm ang. Serie A tawnhriat nei ṭha Edin Dzeko an neih belh bawk - Manchetser City striker hlui hi a kum tam deuh tawh mah se a la hlauhawm.

An player thar Joaquin Correra, Denzel Dumfries leh Nahitan Nandez te hi eng ang taka ṭha nge an ni tih chu fiahin an awm dawn. Juve defender Leonardo Bonucci chuan, "Champion tur chuan Inter hneh a ngai," tiin a lo sawi tawh, Old Lady chuan Inter hi an elpui ber turah an la ngai.

Ronaldo awmna
Juventus leh Serie A nomawi an inzawm tlat a, mahse tun hnai kum 10 chhunga a vawi khat nan season hmasa khan an chawi lo. Champions League-ah team nem zawk Porto hneh loin an zin kawng a tawp bawk.

Champion duh Old Lady hian manager thar, tun hma lama an lo rawih tawh Max Allegri an kokir. Nipui bazara thawn nei hat Cristiano Ronaldo an la nei a, an player duh lai zingah chhuak an awm lo - player thar Manuel Locatelli erawh zaninah a inlan a la rinawm lo.

Season hmasa lama khel ṭha tak Federico Chiesa-a'n Euro 2020 khan a ṭhatzia a lantir zui tawh a, Paulo Dybala, Dejan Kulusevski leh Alvaro Morata te an la neih avangin goal khung lamah chuan harsatna an tawk lo ang tih a sawi ngam.

Tlarhnungah pawh Italy champion puitu Giorgio Chiellini leh Leonardo Bonucci an la nei, tlarhnungah player pathum dah a duh a nih pawhin Dutch defender Matthijs de Ligt an la nei, mual sir lamah Danilo leh Juan Cuadrado te an la nei cheu bawk.

Player mal khaiah chuan Serie A team zingah Bianconeri aia ṭha an awm lo. Italian manager Allegri-a'n training a neih ṭhatpui a, inbuatsaihna an neih hnuhnung berah Atalanta 3-1 a an hneh theih avangin Pathianni zanah pawh point thum an hmuh nghal a rinawm.

Milan ve thung
Season hmasa khan AC Milan hi champion tur angin an lang hman. Season chawhma lamah hma an hruai, mahse manager Stefano Pioli naute hi thlasik chawlh hnuah an zuih a, pahnihna ni chungin season khar mah se nomawi chawitu Inter nen an inthlau viau.

An goalkeeper ṭha Gianluigi Donna-rumma chu PSG lakah an chan a, midfielder pawimawh Hakan Calhanoglu chu an elpui leh hmelma ni bawk Inter Milan lakah an chelh thei lo bawk, anni pahnih hmunruak luah khah hi thil awlsam a ni dawn lo.

Milan hian striker tawnhriat nei ṭha Olivier Giroud an lalut a, France international hian season bul a ṭan nghal ang. Hliam vanga Zlatan Ibrahimovic a chawlh mek avangin Chelsea striker hlui Giroud chungah mawhphurhna a sang dawn.

Swede striker Ibra hi May thla aṭang khan a la inkhel leh lo, season hmasa khan hliam vangin match 26 zetah a inlan thei lo a ni. Theihna nei sang ni mah se chhawr rim tlak a nih tawh meuh loh avangin Milan tan Giroud lakluh hi a pawimawh hle.

Pioli naute hi champion tura rinkai ber chu an ni lo. Amaherawhchu, Milan hian sulhnu ropui leh chanchin ngaihnawm an lo nei tawh ṭhin, season hmasa lama an khelh dan chhut chuan beisei an nei sang ngam ang - ngelnghet taka khelh theih erawh a pawimawh ang.