Zaninah Barcelona an inlan dawn

Lionel Messi nei tawh lo mah se Barcelona-in dan pangngaiin ngaihventu an la nei reng a, an sum dinhmun ṭha lo boruak ringawt pawh Spanish football khawvelah chuan titi tui ber a la ni reng.

Tun hnaia hahchawlhna nei tlem ve tak Barca fan-ten hlimna an hmuh theih nan zaninah Barcelona an inkhel dawn a, team ṭha Athletic Bilbao chu zanin dar 1:30 hian an lenchilh ang.

La Liga champion Atletico Madrid chu Pathianni zan dar 11:00-ah an inlan dawn thung a, Elche an mikhual dawn. Real Madrid pawh Pathianni zanah tho an inlan ang a, dar 1:30-ah Levante chu khualmualah an lenchilh dawn thung a ni.

Pique tel lohna
Club sum dinhmun chhe lutuk siam ṭhat nana a hlawh tihniamtu Gerard Pique chu zaninah a inlan theih a rinawm loh. Pique hian a chawnah hliam a tuar a, club medical lam chuan chawlh hahdam turin an ti a, amah hian chawlh a duh vak lo niin an sawi thung!

Pique hi a chawl a nih pawhin Eric Garci, Ronald Araujo, Oscar Mingueza leh Clement Lenglet an la awm avangin Ronald Koeman tan manganna tur a awm lo. Tlarhmaah Memphis Depay, Martin Braithwaite leh Antoine Griezmann chu inkawp leh tura ngaih an ni.

Messi kalsan number 10 hak zuam lo anga an sawi Sergio Aguero chu hliam vangin a la chawl mek a, Marc-Andre ter Stegen, Ousmane Dembele, Ansu Fati, leh Philippe Coutinho te an la chawl bawk - Barca hian an league match hmasa berah Real Sociedad chu 4-2 in an hneh a, Bilbao hian goal khung loin Elche an inhnehtawkpui thung.

Llorente a rinawm
Atletico-in Elche an mikhual hmain chanchin lawmawm an nei a, an midfielder ṭangkai Marcos Llorente chuan Atletico tana khelh chhunzawm zel duhin kum ruk chhung atan contract thar a ziak.

Kum 2027 thleng atana contract ziaktu Llorente hian kum 2019 khan Real Madrid aṭangin Atletico hi a pan a, match 82-a khelhah goal 18 khungin assist vawi 17 a nei tawh a, season hmasa khan match 45-ah goal 13 khungin assist vawi 12 a nei - Atletico tana cham a thlang hi chanchin lawmawm a tling ang.

Atletico hian tun season-a an league match hmasa berah Celta Vigo chu 2-1 in an hneh a, bench-a Luis Suarez dah chungin an chak - Angel Correa chuan goal hnih a khung a, Argentine forward hian a khelh ṭhat chhunzawm a beisei dawn.

Benzema a cham dawn?
Transfer bazar-ah Real Madrid thawm a reh a, Levante an lenchilh hmaa chanchinthar ber chu Karim Benzema contract thar ziah thu a ni - football journalist lar Fabrizio Romano chuan Benzema hian June 2023 thleng atan contract thar a ziak niin a sawi.

Real hian official takin Benzema chungchang puanzarna hi an la nei lo a, he thuziak i chhiar meuh chuan an puang fel tawh hial thei bawk. Kum 33 mi striker hian seaosn hmasa khan league-ah match 34 khelin goal 23 a la khung thei a, tun season-ah pawh Alaves lakah goal hnih khungin a team a chakpui.

French striker hi a kum tam ve deuh tawh mah se khelmualah chuan a kum upatna hmuh tur a la awm lo a, coach thar Carlo Ancelotti hnuaiah vul chhunzawm zel a tum dawn - Pathianni zanah pawh goal khung a tum ang.