Liverpool-in Salah chelh an tum

Premier League-a an elpuiten transfer boruak thawm lian tak tak an neih laiin Liverpool-in an neih sa chelh lamah ṭan an la chhunzawm zel a, khawthlang media-ten an tarlan dan chuan Reds hian an thiampuipa Mohamed Salah chu kum hnih dang cham turin contract thar an zawrh mek.

Egyptian forward hian kum 2023 thleng Liverpool-ah hian contract a nei mek a, Merseyside club lam thuneitute chuan kum hnih dang contract ziak turin an dawr dawn - Salah hian contract thar hi a ziak a nih chuan Liverpool-a player hlawh hnem ber a nih a rinawm bawk.

Salah hian Liverpool-ah hian kar khatah £200,000 a hlawh mek nia sawi a ni a, tun dinhmuna Reds player hlawh hnem ber Virgil van Dijk chuan kar khatah £220,000 a hlawh mek thung.

Agent pakhat, Liverpool nena inhnaih tak, a hming tarlan lem loh chuan, "Salah leh a team te hian Jack Grealish-a'n kar khatah £300,000 a hlawh tih an hria a, chuvangin inbiakna an kalpui dan tur hi hriat a châkawm.

"Liverpool lam hian uchuak taka hlawh pek an tum ka ring lo a, a in 'balance' theih dan tur an ngaihtuah ang," a ti - Liverpool account tlangzarh hnuhnung bera a lan danin Reds hian player hlawhah kum khatah pound maktaduai 325 an seng a, a hma kuma an sen pound maktaduai 310 aṭangin a sang hle.

Reds hian player hlawha insen hnem lama an tluk loh awmchhun chu Manchester City (£351m) chauh an ni a, a chhan pakhat chu khelmuala an hlawhtlinna avanga bonus lama an insen nasat vang niin an sawi.

Hei vang hian Covid-19 boruak nen Liverpool neitu Fenway Sports Group (FSG) hian player hlimna tawkin, uchuak tak si loin Salah hi contract an zawrh ngei a rinawm.

Kum 29 mi Salah hian Reds tan inelna hrang hrangah match 204 khel tawhin goal 126 a khung a, assist vawi 49 a nei. Champions League leh Premier League nomawi a chawi tawh bawk a, tun season an league match hmasa bera Norwich City an hmachhawn ṭumin goal a khung bakah assist vawi hnih a nei nghal bawk - vawiin tlai dar 5:00-ah Liverpool hian Premier League match khel turin Burnley an mikhual zui ang.

Liverpool hian Trent Alex-ander-Arnold, Fabinho, Alisson leh Van Dijk te chu contract thar an ziahpui tawh a, a tira chhuak tur anga sawi hman Jordan Henderson nen a thuphungin an inrem tawh a, Sadio Mane leh Andy Robertson te chu contract thar pek an tum bawk.