Season bul ṭan fuh lo Man City

Manchester City-in Community Shield-a Leicester City an hneh loh hnuah Tottenham Hotspur hneh loin Premier League season bul an ṭan. Pep Guardiola hote hian zanin dar 7:30-ah Norwich City an hmachhawn dawn a, Etihad Stadium-a inkhel tur a nih avangin an chak ngei pawh a rinawm.

Man City hian July 26 khan Norwich hi 5-0 in an mualah an sawp a, Canaries hian an match hmasa berah Liverpool 0-3 in an hneh lo bawk. Amaherawhchu Pep-a hote hian Euro 2020, Copa America leh Covid-19 vangin season ṭan hmain inpuahchahna ṭha an nei lo a, an ṭhat dan berin an khel lo.

Spurs hmaah pound maktaduai 100 man Jack Grealish-a'n danglamna a thlen thei lo a, Norwich lakah Grealish hi insiamṭhat a ṭul dawn. Man City hian tlarhma tichak turin Harry Kane an beisei a, England captain hi Tottenham-in match hnih an khelh tawhah squad-ah an la dah loh avangin Etihad Stadium a pan ringtu an tam hle.