Bayern khingpui tur Cologne

Bayern Munich-in German Supercup-a Borussia Dortmund an hneh zawh hnuah August 22, Pathianni zan dar 7:00 hian Allianz Arena-ah FC Cologne an mikhual dawn. Dortmund hian zanin dar 7:00 hian Freiburg an tlawh thung ang.

Lewy hi...
Bayern-in Borussia Dortmund 3-1 a an hneh theih avangin Bundesliga nomawi humhim turin an ṭha tawk tih a lang a, amaherawhchu Bavarians hian an player ṭhate hi an chelh theih reng ang em tih hi zawhna a awm chu a ni.

Bavarians sports director Hasan Salihamidzic (Brazzo) chuan, "Player ṭha bik a ni a, Dortmund tan match 60-ah goal 60 a khung. Hetiang player ṭha en thlakna chang kan hriat loh chuan kan hna kan tlin lo a ni ang," tiin Erling Haaland chungchang a sawi.

Nakkum nipui bazarah Haaland hi euro maktaduai 80 (release clause) in a lakchuah theih dawn a, Bavarians tan lei harsa a ni dawn lo. Brazzo thusawi hi Robert Lewandowski-a'n pawm dam mai harsa a ti a, hemi piah lamah Polish striker hian chona thar hmachhawna chhuah a duh tih a awm.

Amaherawhchu Bayern hian khawvel striker ṭha ber tiha chhal ngam Lewy hi hralh an phal lo a, tun nipuiah chuan a chhuah a rinawm loh. Bavarians hian an defender pawimawh David Alaba leh Jerome Boateng te an chhuah tawh avangin team ṭha din tur chuan an player neihsa hi an chelh a ṭul a ni.

Inkhel tur chu
Bayern Munich hi an match hmasa berah Borussia Monchengladbach nen 1-1 in an inhnehtawk a, point thum an hlawhchhuah loh chhanah Gladbach keeper Yann Sommer a ngaih theih.

Pathianni zana Bavarians khingpui tur FC Cologne hian an match hmasa berah Hertha Berlin 3-1 in an hneh thung a, anni pawh hian keeper ṭha tak Timo Horn an kawl. Tlarhmaa awm Anthony Modeste hi sawi hmaih a thiang lo a, French forward hian season bul a ṭan ṭha. Kum 33 mi Modeste hi Lammualah pawh Hoffenheim tana goal khung tawh a ni a, Bundesliga forward langsar zinga mi a ni.

Amaherawhchu Cologne squad hi Bayern squad nena khaikhin ralah chuan a inthlau deuh a, Allianz Arena-a khelh tur a nih bawk avangin Julian Nagelsmann-a hote hi an chetsual nawn a rinawm loh.