Bamford-a'n contract a pawtsei

Leeds United striker Patrick Bamford chuan Elland Road-a kum 2026 thleng cham turin a contract neih lai chu kum nga atan a pawtsei.

Kum 27 mi Bamford hian kum 2018 khan Middlesbrough aṭangin Leeds United hi pound maktaduai 10-in a zawm. English striker hian Whites (Leeds sawina) tan hian match 111 khel tawhin goal 43 a khung tawh a ni.

Bamford hma hian Stuart Dallas leh goalkeeper Illan Meslier ten kum thum leh kum nga atan contract an pawtsei tawh bawk.

Leeds United hian nipui transfer laiin Barcelona aṭangin Junior Firpo chu pound maktaduai 13.5-in an lalut a, Norwegian club Valerenga aṭangin keeper Kristoffer Klaesson an lalut bawk.

North Macedonia defender Ezgjan Alioski erawhin a contract pawtsei loin Saudi Arabian club Al-Ahli a zawm a, hei hi left back Firpo an lakchhan hi a ni.

Hetihlai hian Manchester City aṭanga loan hmanga an hawh mifielder Jack Harrison chu a nghetin a lalut.

Leeds manager Marcelo Bielsa chuan, "Nipui bazar la inhawng mah se player kan lak belh a rinawm tawh lo. Tuna ka squad hi Firpo-a'n Alioski a thlak tih loh chu season liam taa ka player-te tho kha an ni a, ka player neihah ka lungawi a ni," tiin a sawi.

Season liam ta khan Leeds United hi table-ah pakuanaah an awm a, tun season-ah a sang 10 zinga an awm leh theih chuan hlawhtlinaah a ngaih theih ang. Bielsa hote hian league match hmasa berah Manchester United chu Old Trafford-ah 5-1 ngawtin an hneh lo.

Zanin hian Leeds-in Elland Road-ah Everton an mikhual dawn a, Rafael Benítez kaihhruai Toffees hian an match hmasa berah Southampton 3-1 ngawta an sawp avangin tawh an khirh khawp ang.