Roma aṭanga Lazio zawmtu Pedro

European football-a club inhal ber zingah Rome club pahnih AS Roma leh Lazio hi chhiar tel theih a ni a, kum 34 mi Pedro chuan Roma aṭangin an hmelma Lazio a pan.

Pedro hi manager thar Jose Mourinho-a'n mamawh bakah a ngai a, pre season squad-ah vawi khatmah a tel lo. Barcelona winger hlui Pedro hian Lazio-ah kum hnih atan contract a ziak a, Chelsea manager hlui Maurizio Sarri hnuaiah a khel ang.

Rome khaw club pahnih te hi kum 36 chhung player an inlei tawn tawh lo a, transfer hnuhnung ber chu kum 1985 daih tawh kha a ni. Hemi ṭum hian goalkeeper Astutillo Malgioglio chuan Roma aṭangin Lazio a zawm a, defender Carlo Perrone pawhin kum 1982-ah Roma aṭangin Lazio hi a zawm tawh bawk.

Player dang Aleksandar Kolarov, Sinisa Mihajlovic, Diego Fuser, Angelo Peruzzi leh Roberto Muzzi te pawh Lazio leh Roma tan hian an khel kawp tawh a, amaherawhchu anni erawh Rome club pahnih tana an inkhelh inkarah hian club dang an tla zep thung.