Saints-ah Ward-Prowse a nghet

Southampton captain James-Ward Prowse chuan kum nga chhung atan a contract a pawtsei a, St Mary's Stadium-ah kum 2026 thleng a cham ang.

Kum 26 mi Ward-Prowse hi Southampton academy chhuak a ni a, club pakhat chauh tana khel 'one club man' zingah a la tel a, loan hmang pawhin Saints hi a la chhuahsan lo.

Ward-Prowse chuan, "Ka lawm takzet. Khawvela pa hlim ber ka ni hial ang. He club tana rinawmna thu han ziah hi ka inchhuang a, bung thar kan kai dun tur hi ka lawm hle.

"Ka career chhunga a vawi khat nan club dang nen sawizawm ka ni a, chutiang karah chuan club nena inremna siam hi ka duh. Club-in team ho turin min duh a, ka chungah club hi an ṭha em em a, hun ṭha hi ka bawhpelh phal lo," tiin a club hmangaih tana contract a pawtsei thei chu a lawm thu a sawi.

English midfielder Ward-Prowse hian 2012–13 season aṭang khan Premier League a khel ṭan a, kumin hi season 10 a khelhna tur a ni. League bikah Ward-Prowse hian match 270 khel tawhin goal 30 a khung tawh a, ball pet a thiam avangin English midfielder hmuhnawm zingah a tel pha.

Saints hian August 22, Pathianni zan dar 6:30 hian St Mary's Stadium-ah Manchester United an mikhual ang. Ralph Hasenhuttl hote hian league match hmasa berah Everton 3-1 in an hneh lo a, insiamṭhat an mamawh hle.