Naomi Osaka a chak lo

US leh Australian Open champion ni lai Naomi Osaka chu Jil Teichmann lakah 3-6, 6-3, 6-3 in a chak lo. Japanese nula hi Cincinnati Masters khelh laiah last 16 paltlang zo loin a zinkawng a tawp.

Kum 23 mi Osaka hian harsa vak loin set hmasa ber chu a la. Mahse, set hnuhnung pahnihah world number 76 a talbuai duh lo a, wildcard hmanga inlan mai ni mah se Teichmann a chetsual duh miau loh avangin a dingchang zawkah a ṭang.

Grand Slam vawi li champion tawh Osaka chuan, "Nitin hma ka sawn zel, harsana ka neih ṭhenkhat pawh an liam ve zel a, tunah chuan chanchin ṭha lamin min hmuak niah ka ngai," a ti. Chak lo mah se rilru lam harsatna nei Osaka a lungawi.

Inkhel dangah Ashleigh Barty erawhin harsatna a tawk lo. World number 1 hian champion lai Victoria Azarenka chu 6-0, 6-2 in a hneh a, Tokyo 2020 lama beisei a phak lohna mangchhia chu a thaibo leh mek.

Barbora Krejcikova pawhin 2017 champion Garbine Muguruza 6-1, 6-7 (5-7), 6-2 in a hneh. Grand Slam vawi hnih champion tawh Angelique Kerber erawh Jelena Ostapenko lakah 4-6, 6-2, 7-5 in a chak lo thung.