UEFA award dawng thei tur Premier League trio

UEFA-in men's player of the year dawng thei tur player pathum a chhawp chhuak a, an vaiin Premier League a khel vek an ni a; Lionel Messi, Cristiano Ronaldo leh Robert Lewandowski te tan hmun a awm lo.

Player pathumte chu Chelsea midfielder pahnih Jorginho leh N'Golo Kante bakah Manchester City midfielder Kevin de Bruyne te an ni a; hmeichhe lamah Champions League-a Barcelona champion puitu player pathum Jenni Hermoso, Lieke Martens leh Alexia Putellas te an ni thung.

UEFA Men's Player of the Year Award hi 2010/11 season aṭanga sem ṭan a ni a, tun ṭum hi kum 11 chhunga nominee-a midfielder pathum awm vawi khatna a ni. Premier League aṭangin he chawimawina hlu tak hi Virgil van Dijk (2018–19) chiahin a la dawng.

Man City midfielder De Bruyne hian thla 12 liam ta khan Roberto Lewandowski tluk loin pahnihna a ni tawh a, Champions League final-ah Chelsea an hneh loh avangin kuminah pawh chawimawna dawn a harsat a rinawm.

Chelsea midfielder pahnih Jorginho leh N'Golo Kante inkarah Italian midfielder Jorginho-a'n Euro 2020 nomawi a chawi tel a, men's player of the year dawng thei turin a buk a rit ber ang.

Thlan dan kalphung
Coach ṭha thlan chhuak tur hian European Sports Media (ESM) group aṭangin journalist 55 thlanchhuah an ni a, UEFA hnuaia ramten an aiawh pakhat ṭheuh an thawh bawk. Heng bakah hian UCL (32) leh Europa League (48) bakah Euro 2020 (24) a team enkawltu, an vaiin mi 104 ten vote an nei. Vote nei pha chin hian coach/player pathum ṭheuh an thlang chhuak a; pakhatnain point nga, pahnihnain point thum leh pathumnain point khat an hmu a ni.