Man United legend Denis Law-a'n 'dementia' a nei

Scotland leh Man-chester United legend Dennis Law chuan 'dementia' a vei tih hriat-chhuah a ni. Dementia hi rilru kim lohna emaw atna emaw tiin a sawifiah theih.

Nikum khan Man United tana Law-a khelhpui Bobby Charlton chuan dementia a vei tih hriatchhuah a ni tawh bawk. Law hi kum 81 mi a ni tawh a, Alzheimer leh vascular dementia natnaten a tlak buak a ni.

Law chuan, "Kal kawng harsa tak a ni dawn a, a bik takin min hmangaihtute tan chuan a harsa lehzual ang. Ka hmaah hun harsain min tlakbuak dawn a, chuvangin indawhtheihna ka ngen lawk a ni.

"Ka thluak a chhe chho zel a, ka thil hriat theihna pawh a tlem zel avangin thil tam tak ka theihnghilh tawh. Ka natna hian hriatthiam bakin hrehawmna min pe. Thil ka la hriatthiam lai hian ka dinhmun hi sawi ka duh a, nakinah chuan engmah ka hrethiam dawn lo. Chutiang hun ngaihtuah ringawt pawh chu hrehawm ka ti," tiin a natna tawrhin a nghawng dan chu a sawi.

Kum 81 mi Denis Law hian kum 1964 khan Ballon d'Or a dawng a, Scotland tan match 55 khelin goal 30 a khung. Law hi Sir Bobby Charlton leh George Best te nen United Trinity tiha sawi ṭhin an ni.

Law hian Huddersfield Town tan bul a ṭan hnuin Manchester City leh Torino tan a khel a, Manchester United-ah a vanglai hun a hmang. United tan hian Law hian match 404 khelin goal 237 a khung a, a hunlaia inelna sang ber first division nomawi pahnih bakah European Cup leh FA Cup nomawi vawi khat ve ve a chawi bawk.