Europa League khelh tum Rangers

Champions League an khelh theih loh hnuah Rangers-in a 'dawttu' tal khelh an tum a, Ningani zan khan Europa League playoff round-ah Alashkert chu 1-0 in an hneh.

Sheffield United aṭanga Rangers zawmtu John Lundstram chu minute 43-naah hnawhchhuah a nih avangin Scottish champion hian an hun tam zawk chu player kim loin an khel a, hetichung hian an chak.

Mualneitu Rangers tan Alfredo Morelos chuan minute 67-naah inkhela goal awmchhun hi a khung a, Armenian club Alashkert-in a chhanletna tur an nei lo - August 26 zanah second leg an khel leh ang.

Rangers manager Steven Gerrard chuan, "Inelna kan hmachhawn a, kan club leh tun hnaia kan dinhmun hi a inrem lo a ni. Kan theihna tak tak kan phochhuah leh a ṭul a, kan harh a hun tawh.

"Chawlhlawkah khan player-ten ka thusawi an ngaithla ṭha a, chuvang chuan hnehna kan chang zui. Mahse, tun aia nuamsa zawka chak thei kan ni," a ti a, a lawm a kim loh thu a sawi.

Season hmasaa tlawm nei loa Scottish champion ni thei Rangers hian season bul ṭanna league-ah 3-0 in Livingston hneh mah se Champions League qualifying third round aṭangin petchhuah an ni a, Dundee United chuan league-ah an hneh bawk.

Mahse, Rangers hian insiamṭhat hna an thawk mek - League Cup-ah 5-0 ngawta Dunfermline Athletic an hneh hnuin Europa League playoff first leg-ah an chak leh ta a, beiseina a sang zel ang.

Europa League playoff inkhel ngaihven hlawh dangah Galatasaray chuan rin loh takin Randers chu 1-1 in an inhnehtawkpui a, Slavia Prague leh Legia Warsaw te 2-2 in an ṭin a, Fenerbahçe-in 1-0 in HJK Helsinki an hneh a, Olympiakos-in 3-0 in Slovan Bratislava an sawp thung.