Mourinho a chak nghal

Jose Mourinho-a'n AS Roma a pan hnua competitive match hmasa ber chu Ningani zan khan a hmachhawn nghal a, Europa Conference League playoff-ah Trabzonspor chu 2-1 in an hneh.

Roma tan captain Lorenzo Pellegrini chuan minute 55-naah goal hmahruai a khung a, Turkish club tan Andreas Cornelius chuan minute 64-naah si phurh hi a sut.

Mourinho-a'n draw result nen Turkey a hawsan mai dawn niin a lang hman a, mahse, Roma tana a match hmasa berah Eldor Shomurodov chuan a team a chhanhim.

Uzbekistan international hian minute 81-naah chakna goal a khung - kum 26 mi striker hian nipui transfer-ah euro maktaduai 17.5-in Genoa aṭangin Roma a zawm a, a man hi la san belh leh thei tura tih a ni.

Roma goal hmasa zawk hi Henrikh Mkhitaryan-a assist aṭanga goal a ni a, Manchester United lama Mourinho nena inmil lo anga sawi attacking midfielder hian Portuguese coach kaihhruaina hnuaiah hmun pawimawh a chang zel tura beisei a ni.

Mourinho kaihhruaina hnuaiah Roma hian Pathianni zan dar 12:15 hian an league match hmasa ber an khel dawn a, Fiorentina an mikhual ang.