Europa Conference League: Spurs an tlawm nghal!
European football-a club inelna sang pathumna Europa Conference League playoff chu khelh ṭan a ni ta a, Tottenham Hotspur chu an match hmasa berah an tlawm nghal!
European football-a club lian pawl ni tura indin tum mek Spurs hian khualmualah Portuguese club vantlang Pacos de Ferreira an lenchilh a, 1-0 in an tlawm - Lucas Silva chuan inkhela goal awmchhun hi a khung a, Spurs lamin a chhanletna tur an nei lo.
Tottenham-in an league match hmasa berah 1-0 in Manchester City an hneh a, transfer bazar-ah thawm an neih ve reng bawk avangin Spurs chungah beiseina pawh a sang hman hle.
Mahse, London club-in anmahni faktute fakna chil per pawh a hul hmain result duhawm lo an nei nghal a, chutihrualin, second leg khelh tur an la neih avangin beisei tur erawh a la awm.
Kane a tel lo
Tottenham boss Nuno Espirito Santo-a'n Portugal-ah awlsam taka chak theih a beisei a, City an hneh ṭuma bul ṭantu aṭangin bul ṭan nawn player an awm lo - thutlukna dikah ngaih a ni.
Manchester City pan tur anga sawi thawm awm reng Harry Kane chu squad-ah pawh a tel lo a, City laka goal khungtu, player thiam bik Son Heung-min pawh zin zingah a tel lo.
Chutihrual chuan Spurs hian 'chhuanlam' tur an nei lo. Pound maktaduai 46 chuanga an lakluh centre back Cristian Romero chu bul ṭantir a ni a, pound maktaduai 2.6 baka Erik Lamela pe tel chunga Sevilla aṭanga an lei Bryan Gil chuan bul a ṭan bawk.
Defender Matt Doherty, Ben Davies, midfielder Harry Winks leh Giovani Lo Celso ten bul an ṭan bawk a, Spurs starting XI thlirin season hmasa Primeira Liga-a pangana laka tlawm tur chu an ni lo.
Mahse...
Football-ah erawh thleng thei lo a awm lo a, a dikna hmuhtirin kan awm nawn - minute 45-naah Lucas Silva chuan defender man to Cristian Romero dan hman lohin ball a lalut a, goal hmahruai a khung.
Portuguese club khelmuala hmuhnawm lo tak Spurs an harh zawk tura ngaih a ni a, mahse, London club hian an nawr let thei lo. Minute 90 chhungin vawi thum chiah shot an nei a, target-a kal a awm miah lo - an phu ang ngeiin an tlawm.
London club hian 64% ball an chang a, mahse, ball chang tam zawk an nihna hi goal hmaah an lantir thei lo - Atalanta aṭanga loan hmanga an hawh goalkeeper Pierluigi Gollini-a'n a match hmasa berah goal a chhuah nghal a, a mangphan bul ṭanna chu a ni lo tawp ang.
Spurs tan Pacos laka an inkhel hian chhinchhiah tlakna pakhat a nei - rawlthar Nile John (kum 17) leh Dane Scarlett (17) te chuan Spurs tan a vawi khat nan bul an ṭan a, Maksim Paskotši (18) leh J'Neil Bennett (19) te chu bench aṭanga lutin London club tana an match hmasa ber an khel a, phir unau Michael leh Matthew Craig (18) erawh bench lamah an awm tluan.
Europa Conference League leh Lawmman
UEFA-in Europa Conference League a siam hi tam tak tan chuan a ṭul loa ngaihna a awm mai thei. Mahse, ngun zawka thlir erawh chuan ram tenau leh club tenau zawk tan chuan European football khelhna remchang a ni a, coach leh player lar hmachhawnna remchang a ni bawk.
Chutianga coach leh player lar hmachhawn chuan club tan sum lakluh kawngah nasa takin a pui a, ticket hralh piahlamah television aṭanga an sum hmuh tur thlengin a pun phah thei a, club lian lo tan chuan a ṭangkai hle. Hei mai a ni lo - champion team chuan euro maktaduai nga an dawng dawn a, group stage inpetkai hrim hrim hian euro maktaduai hnih chuang an dawng dawn - an inkhelh apianga an pawisa dawn turte nena ngaihtuah phei chuan hlawkpui tham a ni.
Lawmman chu:
First qualifying round elimination: €150,000
Second qualifying round elimination: €350,000
Third qualifying round elimination: €550,000
Play-off round elimination: €750,000
Qualified to Group Stage: €2,940,000
Match won in Group Stage: €500,000
Match drawn in Group Stage: €166,000
1st in Group Stage: €650,000
2nd in Group Stage: €325,000
Knockout round play-offs: €300,000
Round of 16: €600,000
Quarter-final: €1,000,000
Semi-final: €2,000,000
Runner-up: €3,000,000
Champion: €5,000,000
*€ = euro
Hmelhriat loh Europa Conference League
European football-ah club inelna lar tak pahnih a awm a, chu chu Champions League leh Europa League a ni. Tun season aṭangin Europa Conference League a awm a, eng inelna nge? tiin tam tak chu kan bang bo ngei ang.
UEFA chuan he inelna hi Champions League leh Europa League hnuaia club-te inelna tura a siam a ni a, European football-a club inelna sang pahnih ang lo takin group stage-a tling chiang sa an awm lo thung.
First round
Kumin ECL hi UEFA hnuaia inelna dang ang thoin first qualifying round aṭanga khelh ṭan a ni a, hetah hian team 66 an inel. UEFA chuan UEFA country coefficients ranking milin ram tin ranking a siam a, chuta an ranking mil chuan qualifier khelh ṭan dan tur a duansak.
First round-ah hian ranking 36-55 inkara awm ram 20-a domestic cup champion, ranking 30-55 ram zinga league-a pahnihna club 25 leh league-a pathumna club 21 (ranking 29-50) ten inelna an hmachhawn a, an chak chuan second qualifying round an lut.
Second round
Hetah hian team 108 an inel - team 33 chu first round aṭanga lut chho an ni a, anni hi main path an tih, team 90 inelnaah an lut - main path-ah hian domestic cup champion 17 (ranking 19-35), league-a pahnihna club 14 (ranking 16-29), league-a pathumna club 16 (ranking 13-28), league-a palina club 9 (ranking 7-15) leh ranking parukna ram league-a pangana team-te an awmho.
Champions path-ah team 18 awmin anni hi Champions League preliminary round aṭanga tla team pathum leh Champions League first qualifying round aṭanga tla club pathumte an ni thung.
Third round
Hetah pawh hian champions path (team 10) leh main path (team 54) in ṭhen leh a ni a, he group bikah hian second round champions path-a chak team pakua leh Champions League first qualifying round aṭanga tla club pakhatte an lut.
Main path-ah hian second round main path-a chak team 45 an lut chho a, a bak club pakua hi domestic cup champion (ranking 17 & 18) pahnih, league-a pathumna club paruk (ranking 7-12) leh ranking parukna ram league-a palina club pakhatte an ni.
Playoff round
He round hi Tottenham Hotspur khelh ṭanna round a ni - champions path-ah team 10 awmin anni hi third round-a champions path-a chak team panga leh Europa League third qualifying round (Champions Path) a chak lo team pangate an ni.
Main path-ah club 34 awmin ranking-a pangana ram league-a pangana, league-a parukna ni phak pali (ranking 1-4; England aṭang chuan League Cup champion), third round main path-a chak team 27 leh Europa League third qualifying round (Main Path) aṭanga tla club pathumte an inel thung.
Kalphung
Club dinhmun a zirin inelna kalphung hi thlak danglam a ni - entirnan a dan ang chuan playoff (main path) ah team 34 awm tur a ni a, mahse, kumin playoff (main path) a team tel thei zat hi chhutin 35 niin a lang.
Hei hi a chhan ber chu, ranking-a pakhatna Spain league-a parukna Villarreal chu Europa League champion an ni a, automatic-in Champions League khel turin an tling - hei vang hian ranking 1-4 aṭanga league-a parukna ni phak pali tel tur aṭangin club pathum an tel a, third round main path-a chak team 26 tur kha 27-ah a sang a, a dik ta chiah a ni.
Group Stage
Playoff-a chak team 22 chuan ECL group stage an inpetkai a, Europa League play-off round aṭanga tla team 10 chu ECL group stage-ah hian dah an ni bawk. Group tina pakhatna chu last 16 an lut chiang nghal ang.
Mahse, last 16 hma hian preliminary knockout round khelh leh phawt a ni dawn a, hetah hian group tina pahnihna leh Europa League group stage-a pathumna club pariatte chu an inkhel leh ang a, a chak zawkin last 16 an lut ve leh dawn a ni.