First Class Cricket leh Zofate (Part 1)

Supreme Court hmalakna kaltlanga Lodha Panel thuchhuak zar zoin,  zan khat thilthuah Cricket Association of Mizoram chu kum 2018 khan member pumhlum a lo ni ve ta. BCCI member nih hi Mizoram tan chuan pialtlepa liluh tum ang maia harsa a ni a, Sam ziaktuin, "thangkamtute thang ata sava a chhuak angin... thang chu a chhe ta a, keini hi kan chhuak ta hlauh a ni" a tih ang mai khan thawhlehkhatah Mizote tan hun ṭha a inher chhuak. 

BCCI member nih theihna tura kum kha leh chen hruaitu hmasaten mut mu pawh tuah loin an bei kha a ni a, Mizoram Cricket chhungkaw tan chuan phur leh lawm avanga sial meuh khawn thluk a, khuangchawi mai a châkawm rualin a huhphurhawm lutuk avanga luaithlinulna leh chaw ei tui loh khawpna tur dinhmun a ni.

Football, hockey leh infiamna dang zawng aia hmelhriat loh, tu emaw fiamthu ang taka, 'nula fiam pawh ka thiam zawk' an tih ang maia lar lo. Kan chenna ram Vairengte pelh chiaha lar namen loa a lar avanga vaivawm kan tih ṭhin chu, Mizorama sipai rawn awm Assam Rifles ho leh phai lama lehkha zir hawngten an rawn uar ṭan kan ti thei ang.

Cricket Association of Mizoram erawh Gospel Centenary kan lawm hma deuh kum 1992 khan lo indin daih tawhin, local tournament te han huaihawt ve ṭhin mah se, eizawnna aiah tih larna, a phur leh tui fal tena mahni sum leh tha senga an lo kalpui kha a ni ber a. Govt Mizo High School (High Field) khelmual te hi cricket in ṭanna pakhat tia sawi theih a ni.

Hun a lo liam hret a, hruaitu hmasa inpete leh mi thilphalte zarah, Ramhlun Sports Complex vaivut kara, rem leh rem loa carpet chunga in vaivawm ṭhin val rualte kha, 2014 kum a lo inher chhuah meuh chuan, sorkar tibuai miah loa an sualchhuah international size khelmual, phul leh pitch dik tak chungah ball kan um tleu ta zar zar mai le.

ILP hman ngaihna huam chhung kan Zotlang ram nuam chhungah na na na chuan, a khelchhun tlem a zawngte kha mahni tawka Sachin-a, Kapil Dev-a te kan ni ve chiang a lawm. Central YMA-in branch inel nana infiamna zingah an telh aṭang erawh a ṭhang chak ta hle. Zep thu erawh a cheng lo, a hmingin Mizoram team te han feh chhuak ve ṭhin mah ila, Lailapur kan pel awrha Silchar District team-ten kalpahin minlo nawp nek zel thung. Tlawmah erawh he Zopa thinlung hian a la lo a, kan la patuai deuh a, inzirna tur a ni tiin kan feh chu kan lo haw leh mai ṭhin.

Chutianga Assam District team khat pawh hneh hleithei lo, cricket aia infiamna tam tak lar zawkna ram chuan, India rama cricket inelna sang ber, khawvel huapa International dawttu chiah First Class Cricket an tih chu a hmachhawn ve a ngai ta si.

Football tuina ramah hian UEFA Champions League kan hmelhriat deuh vek a, Home and Away awmzia pawh hrilhfiah nawn kher kan ngai lo ang. Kan rama  kan khelmual chhuanvawr leh neihchhun Suaka Memorial Cricket Ground lah tihfel tur a la tam si, 5 star hotel chu sawi loh, inkhel pakhat huaihawt tura player leh official za tel vahvelna tur Deluxe AC Bus lian chi khawchhung tlan pakhat pawh nei ve lo, India ram dai kilkhawr state chu, BCCI chuan keh thei dawma dawmin, nausen pianghlim chan chang si, a pian ni hapta la la a, Primary School-ah tal kai tir nghal ngai si ang dinhmunah kan awm ta.

50 overs inelna sang ber, Vijay Hazare Trophy khel turin, suangtuahnaah pawh kan thlir ngai loh, thlawhtheihna changkang chi tinreng aṭanga, 5 star Hotel ropui ber berah innghatin, leilung siam tirh a ta a vawi khat nan Mizoram 1st class Cricket team chu Gujarat leilung kan han rap kai ve ta. Heti lai mek hian age group chi hrang hrang leh hmeichhe team-te pawh an fehchhuah a ngai ta bawk. Hmeichhe team mawlh mai te hi aw! cricket khel bar awm hek suh, infiamna danga tui zawkte leh ṭhahnemngai thei deuh turte fawm chawpin  team an han remkhawm ve a. Kum hnih a lo ral meuh chuan, boruak erawh a lo danglam ta a, lung tilengtu te pawh a chang ta hial.

Vairengte chu sawi loh mahni khua pawh la pel mang lo, Cricket tui avanga, Zoram chhunga lo vahvaihpui valrual ho tan hun ṭha a inhawng. TV-a Anil Kumble a te vawm dan hmuh aṭanga thiam ang anga lo inzir ve ho chu BCCI chuan khelmual, riahbuk, bungrua ṭha ber ber piah lamah min kaihruai turin coach ṭha a pe.

India cricketer lar Kumble te, Rahul Dravid te lo kaihruai tawhtu, India Cricket mi hrang ni pha PV Shashikant chu BCCI-in Mizoram enkawl turin a ruat. Warm up, fitness, training, ei leh in tih vel pawimawhna hre tak tak lo ho chu India leh ram dang cricketer tam tak lo thawhpui tawhtu, Suhash Pawar a te leh Support Staff dang Physio etc tih vel te nen kan ri  ta nuk mai.

Khelmual pawn leh a chhung zawng zawng chu dai ngai loh ram a ni a, tun hnua han ngaihtuah let hian, mang rama vanram fangte pawh kan lo ang awm mange ka in ti leh hnuhnawh.

2018 Mimkut Thla Tahrik 18, a lo inher chhuah chuan Gujarat rama Nadiad khua Cricket Ground changtlung takah chuan, kan hmarchhak unau Arunachal Pradesh te nen chuan Mizoram cricket chanchina bung thar tur ni a lo inher chhuak. Thiam vang leh ṭhat vang ni loin hruaitute duhsakna zar zoin, he thu butsaihtupa hi, Zofate tana ni chhinchiah tlak taka ṭhum vawr tura team aiawha khelmual lai taka Arunachal captain leh TV vela kan lo hmuh fo Match Official hova kan han penchhuak te kha, han mitthla let leh hian, tuna he thu buatsaih lai pawh hian ka la mur chum chum thei zuk nia.

Kan hmarchhak state puite hi, Associate member an lo nih tawh angin, 1st Class Cricket chu la khel bik chiah lo mah se, BCCI hamṭhatna sum leh pai leh thildang dawng a, kum bithliah (age group) level a kum 10 chuang fe lo tal tawh an nih avangin, a mihring inkhel turte leh tawnhriat aṭang pawhin kan u te vek an ni.

India cricket chhungkaw zinga za zela pakhat pawh hi hnehna kan chan ring an awm kher lo ang. Team rawng mil ngal kawr nalh tak la inbel ngai lo leh Kookobora ball sing chuang man la hum ngai lote khan, mahni thiam ang ang leh BCCI-in min kaihruai tura min pek ni 4-5 vel chauh kan la hmelhriat coaching staff te min kawhmuh leh zirtir chawp thil te chu han fawm khawmin, thih tha chuan kan han bei ve ta chu a nia.

Khelmual chhungah thu lawmawm chhuan tur kan nei lem lo. Hei chu khawvelin a rin lawk sa a ni. Chutihrualin zahna tur kan tan a awm lo, mi thar kan nih miau avangin lawmna tur hlir zawk a la ni.

Ka dai chin apiang kan ram, kan thlen chin apiang bung thar tia kan infuih sauh sauh karah, September 26, 2018-a, inkhel ṭan hun zing dar 9:30-a tumah rin loh Mizoram team chuan, tlai dar 4:00 a rik chuan Sikkim batsman te kan vawm hlum ta vek a, 'upset' a thleng.

Mizoramin, a vawi khat telna, List A cricket sang berah run 42-a hnehna changin, lawm avanga mittui tla leh team pumpui inkuah khawm kara ka hnuk ulh leh ka thaw chham inkawp lai te kha, ka thih ni thlenga ka theihngilh tawh loh tur ka hun tawn ṭhenkhat zinga mi a ni ngei ang le. Mumang hi a lo thleng dik ngai anih chuan, hei bak hi ka khawvel dai chinah eng nge awm chuang ang ka la in ti fan.

International Cricket dawta level sang ber, India mai ni lo, Khawvel puma League ngaihhlut Ranji Trophy khel turin kan inbuatsaih zui a. Mizoram lamah la thlen ve theih ni hek suh, BCCI chuan State neinung deuh te min mikhual tirin, kan ipte pui ban nan Jorhat khawpui min han pe rawih mai a.  Mahni home a inkhel angin, a thla a thla tel chu Hotel  kha kan chenna a lo ni ta a, India ram chhim leh hmar, chhak leh thlang kan hrut kual a, kar hmasa lama Jorhat a inkhel kha, a karleh lamah Dehradun khaw vawt hnuaiah, a lehpekah Puducherry khaw lumah kan vir tawn ta zak zak mai. 

Professional infiammite nun a takin kan paltlang a, coaching staff, manager, association hruaitu, teammate, kan zin bosan nupui fanau, chhung leh khat ṭhenrual ṭhate pawimawhzia a lo lang fiah ṭan ta. Urlawk zan leh kumthar ruaiṭheh vela fatu leh ṭhalai buai zinga tel ṭhin ho kha, Chhandamtu pian ni champhaah te ball kan um ni leng a, kumthar ruai ṭheh niah te, hlate khua, hnamdang au thawm karah, zaikhawm kut ben aia boundary tia au chunga kut ben dur dur kha kan khawvel a lo ni ta.

Ni li chhung inkhelh, skills leh experience sang tak ngaihna Ranji Trophy kan hmachhawn hmasak ber ṭumah hian, khelmual lamah chhuan tur kan hnutchhiah tam lem lo. Ni li daih mang lo a, ni thumnaa tumpuiten min tuk zal chang a tam zawk. Mahse, inkhel ṭhenkhata a ball vawm lam chang tute spin department-ah senior player Zarkawt mihrang Zorinliana te, Armed Veng spinner Lalhmingmawia te, Champhai tlangval Lalrempuia te hoin batsman ṭha zawk an han chhaihbuai ṭum  spell hmuhnawm tak tak te, kan fast bowler Kima Varte ten ni sensa hnuaia, wicket 2-3 an han la te, coaching mumal vawi khat pawh la lo, mahni talent pianpui Kulikawn tlangval Michael Lalremkima, kan group a team ṭha ber zinga mi Puducherry lakah, Sachin-a te nena India tana lo khel ho tawh 135 kmph vela kawha ball vawm Pankaj Singh-a ten an han vawm hlum thei der lo te kha, kan tan chuan infiamna Goliatha leh Davida chanchin a ni pha tawh hrim hrim.

Team ṭha ber zinga mi, naupang chhia ang leka min ngaitu Bihar laka kan pace bowler rinrawl Bawngkawn tlangval Lalhruaimawia Ralte-in wicket nga ṭum khata an lak zet phei kha chuan, 1st Class Cricket a Fiver la thei zingah Zopa hming lan ṭanna a lo ni ta hial. Champion tluk zetin kan lawm a ni.

T20 inelna lian Mustaq Ali Trophy, Cuttack khawpuia kan khelh meuh chuan, India cricket bupui Karnataka, Bengal, Haryana te nen kan han inchalhtauh ve rap rap mai a. Kan dinhmun dik tak chu,  Fanghmirin saipui insual puiah cho tlat ang vel kha a nihna chin pawh awm mah se, bung thar kan kai zel a. A hma lawka TV a kan lo star ṭhinte kha kan tumpuite an ni ta thut a, inkhelh lai meka mumang a nih mai rinhlelh avanga mit nuai ngun ber zinga mi ka ni hial ang.

India leh IPL star Manish Pandey, Mayank Agarwal, Ashok Dinda, Wridhaman Saha, Amit Mishra  te hoin min nawp nek hnuah, inkhelh ban paha kan han in selfie pui ta ṭhin te kha kan demawm lutuk bik lo.

BCCI ngaihhnathiamna sang ber leh hruaitute remhriatna te, Hotel Regency neitute thawhrimna leh khelmual lam cheitu Lalzuiliana leh a hote inpekna a zarah Under 16 inkhel pahnih Suaka Memorial Cricket Ground, Sihhmui lama kan thleng thei leh age group lama inkhel ṭhenkhata hnehna kan chang ve thei te kha kan kum khatnaa hmai ti uang ve thei awmchun chu a ni mai awm e.