Glenn Murray tan contract thar

Brighton striker Glenn Murray chuan Premier League club tana kum khat dang khelh chhunzawm turin contract thar a ziak a, June 2021 thleng Brighton tan a khel dawn. 

Kum 36 mi striker hian Brighton tan inelna hrang hrangah match 278 khelhsak tawhin goal 111 a khungsak a, club tana goal khung hnem ber record chelh turin goal 14 bak a mamawh tawh lo. 

Murray hian 2007-10 inkar kha Brighton-ah hun hmangin League One-ah a khel a, match 136-ah goal 57 a khungsak. Crystal Palace, Reading leh Bournemouth tana a khelh hnuin 2016 khan Brighton-ah bawk hian a kir. 

Brighton-a a kir kum hian Championship an khel a, inelna hrang hranga match 47-ah goal 23 a khungsak. 2017-18 season-ah Premier League a kaipui a, inelna hrang hranga match 38-a khelhsakah goal 14 a khungsak. 

Season hmasa khan match 42-ah goal 15 a khung a, tun season-ah erawh vawi li chiah league inkhelah bul ṭanin chhuak tur anga sawi hman a ni - contract thar a ziak ta zawk. 

Brighton manager Graham Potter chuan, "Club tana Glenn hnathawh hi kan hre vek a, player pawimawh tak a ni. He club hi a hmangaih a, nuam a ti em em a ni," tiin a sawi.