Ugas lakah boxing legend Pacquiao a tlawm

Kum hnih chhung a chawlh hnuah Manny Pacquiao-a'n Pathianni khan boxing ring a rawn rap leh a; amaherawhchu boxing legend hi Cuban boxer Yordenis Ugas lakah chiang takin a tlawm.

Las Vegas-a WBA (super) welterweight title inchuhna hi Pacquiao vangin ngaihven a hlawh a, kum 42 mi 'PacMan' tiha kan hriat lar hian tun hma a pha ta lo.

Kum 35 mi Ugas hian unanimous decision-in hnehna a chang a, judge pathum point pek dan -115-113, 116-112 leh 116-112 - hian Cuban boxer chungnun zia a tilang.

An inhnek dan
Manny Pacquiao inhnek hnuhnun ber chu July 2019 kha ni a, WBA welterweight title inchuhnaah Keith Thurman a hneh. Division pariata world champon ni thei PacMan hi a tirah chuan WBC leh IBF welterweight champion Errol Spence Jr nen inhnek tura tih an ni.

Amaherawhchu American boxer Spence Jr hi a mitah hliam a neih avangin zai a ngai a, ruahmanna thar siam a ṭul phah. August 10 khan Pacquiao hmachhawn tur tihchian a ni a, WBA welterweight champion Ugas an thlang ta a ni.

Ugas hian nikum September thla khan PacMan-a kalsan WBA welterweight champion chu Abel Ramos nen an inchuh a, hnehna a chang. Cuban boxer hian a 'title' humhim tur hian Fabian Maidana hmachhawn a tum a, Pacquiao a remchan takah chuan sum tamna leh mipui ngaihven tur zawk a thlang.

Ugas a chak
Boxer pahniha naupang zawk Yordenis Ugas a chungnung a, boxer uai thla lam tawh Pacquiao hneh turin harsatna a tawk lo. Tihian Cuban boxer record chu vawi 27 chak leh vawi li chak lo a ni.

Ugas chuan, "Ka lawm hle. Hetiang hun ṭha min petu Manny Pacquiao chungah lawmthu ka sawi tak meuh a ni. Kar hnih chauh training-na hun kan nei a, coach-te min hrilh ka zawm ṭha. Pacquiao ka zah a, chutihrualin a chak zawk ka ni a, WBA champion ka ni," tiin a sawi.

A chawl dawn lo?
Manny Pacquiao hi boxing chawlhsan tura ngaih a ni a, an inhnek zawha zawhna hmasa ber pawh 'I inhnek tawpna ber tur a ni em?' tih a ni.

Pacquiao chuan, "Ka hre lo. Ka hahdam phawt ang a, chumi zawh chuan thutlukna ka siam ang. Ring chhungah insiamrem ka harsat a, ka ke kha duh angin ka che thei lo. Ka chak lo hi pawi ka ti a, ka theihna zawng zawng erawh ka chhuah," tiin a sawi.

Filipino boxer Pacquiao hian fight 71 aṭangin vawi 62 a chak a, vawi 39 a knockout. Ugas a hneh loh avangin PacMan hian vawi riat hneh loh a tawng a, vawi hnih an inhnehtawk bawk.

Pacquiao hian weight divison pariatah major world title 12 zet a la thei a, a vanglaiin Oscar De La Hoya, Ricky Hatton bakah boxer ṭha tam tak a hneh. Chutihrualin kum 2015-a Floyd Mayweather Jr. a hneh loh erawh a career-a ser lian takah ngaih theih ni mah se a inhnek dan hmuhnawm tak leh record ropui tak avangin boxer ṭha chungchuang zingah chhiar tel a ni reng ang.

Round tin thlirna
Round 1: Pacquiao-a'n bul a ṭan ṭha a, a nawrtu zawkah a ṭang nghal. Philippines boxer hian a hnek chhuak tam a, round tawp lamah erawh Ugas hi a lenna leh chakna hmangin a insiamrem. Chutichung chuan round hmasa berah PacMan dinhmun a ṭha zawk.

Round 2: Nasa takin Ugas a rawn insiamṭha a, Cuban boxer hian a ban seina rawn hmang ṭangkaiin ban tawi zawk Pacquiao aiin jab hmangin a hnek chhuak ṭha zawk. Filipino hian round tawp lamah a ranna rawn lantir mah se Ugas a chungnung zawk.

Round 3: Pacquiao-a'n insiamṭhat tumin a rawn hnek chhuak tam leh a, amaherawhchu Ugas-a'n thiam takin a lo in bum a, counter hmangin a hnek ṭhin bawk. Mipuiin PacMan an ṭan a, che ṭha zawk hriatthiam a har.

Round 4: Ugas-a'n Pacquiao kawnghren zawnah a hneksak a, PacMan hian a kawng hnuai tiin a sawisel. Referee-in Pacquiao hi hahdamna hun a pe a, Ugas erawhin warning a dawng. Amaherawhchu Ugas a che ṭha zui a, Pacquiao erawh a insiamrem thei lo.

Round 5: Pacquiao a rawn insiamṭha a, Ugas pawhin round dang aiin kut tum a dawng tam. Cuban boxer hian counter hmangin hnek bawk mah se Filipino a che ṭha zawk.

Round 6: Ugas a che ṭha hle. Cuban boxer footwork ṭhatna a lang a, a khingpui hnek nan 'jab' a hmang ṭangkai.

Round 7: An bul ṭan dan nung chiam lo mah se bell rik hnu thlenga an inhnek avangin boruak a san phah. Ugas-a hmanraw ṭha ber chu jab a ni leh a, Pacquiao a che hlei thei lo.

Round 8: Pacquiao-a'n a hnek chhuak tam a, hnek fuh erawh a ngah lo. Ugas erawhin chiang takin a hnek fuh a, ama tana ṭha turin inhnek a ti muang. Boxer pahnih an intluk tawk hle.

Round 9: T Mobile Arena-ah Pacquiao chak lai an hmu duh a, round 9-ah Filipino a rawn che ṭha leh hret. PacMan hian a kut ranna a rawn hmang a, Ugas tan buaina tham ni lo mah se point hmuhna tham a ni thung.

Round 10: Pacquiao-a'n bu a ṭan ṭha a, a tawpah erawh Ugas a chungnung zawk. Cuban boxer hian a kut dinglamin PacMan a hnek fuh a, chiang taka sawi tur ni lo mah se Filipino a buai phah.

Round 11: Pacquiao bawkin bul a ṭan ṭha a, Ugas luah a hnek fuh. Amaherawhchu Cuban boxer hian ṭha takin a chhanglet. He round-ah hian tu nge ṭha zawk hriat a har a, chutihrualin Cuban boxer hian scorecard-a buaina nei miah lo turin thapui a la chhuah thei tih a lang.

Round 12: Ugas-a'n chak ngei tumin bul a ṭan ṭha a, bul ṭan phatah a rawn one-two nghal. Kum 42 mi Pacquiao-a'n tha hrui a ngah tawh lo a, a chhanletna tur a nei lo. Chutihrualin Filipino hi a tuarchhel a, round 12 chhung a ding tluan theih phahah a ngaih theih. Cuban boxer erawhin a chak dawn tih a hria a, chung lamah a ban a phar nghal.