5 Star Manchester City

Premier League champion Manchester City-in Inrinni zan khan Championship champion Norwich City 5-0 in an sawp a, Pep Guardiola hote tehfung hrang hrang aṭanga tehin an ṭha vel vek. Man City hian August 28, Inrinni tlai dar 5:00-ah Arsenal an mikhual leh ang.

Eithad Stadium-a inkhelah hian Norwich keeper Tim Krul-a'n an lamah a ti lut a; Jack Grealish, Aymeric Laporte, Raheem Sterling leh Riyad Mahrez ten goal khat ṭheuh an khung. Man City tana Ferran Torres-a goal khung erawh VAR hmanga en let a nih hnuah pawm a ni lo.

Danglamna Jesus
Man City tana khel ṭha ber chu Gabriel Jesus a ni a, Brazilian forward hian goal khung lo mah se a phu ang ngeiin man of the match an hlan. English club hian Sergio Aguero thlakna tur player an lalut thei lo a, player chhawr rim zingah forward anga chhal theih chu Jesus chauh a awm.

Jesus hian Norwich lakah bul ṭan mah se a hma tawng bera awm chu Torres a ni thung a, Brazilian forward hi mual vei lamah a ṭangkai hle. Minute sarihna lekah goal hmahruai a lut a, Rodri ball vawrh luh tawih zet chu Jesus-a'n la thlain kawh zetin a cross lut a, Norwich defender Grant Hanley-a'n khawih a per hnuah keeper Tim Krul-a perin goal-ah a lut.

Minute 15-naah Torres-a'n goal a khung a, Jesus a pass tho a ni. Amaherawhchu VAR hmanga enlet a nih hnuah Bernardo Silva-a'n Norwich midfielder Milot Rashica a pal avangin pawm a ni lo.

Pound maktaduai 100 man Grealish-a'n minute 22-naah goal a khung a, Jesus siam ṭhat vang liau liau a ni. Aston Villa captain hlui hian Jesus-a cross hi a dang sual a, goal-ah erawh a lut ta tho.

Jesus hian second half minute 71-naah substitute Sterling-a goal khung tur a siamsak leh bawk a, hun tawp thlengin Norwich tlarhnung chhaih buaitu ber a ni. Pep Guardiola chuan, "Jesus hian engmah a sawisel ngai lo a, amah hian zah a phu. Player ṭha tak a ni a, amah aṭang hian kan inzir tur a ni.

"Striker angin a khel thei a, ding leh veiah a awm thei a, team-in a mamawhna ang zelah a awm thei. Bench aṭanga lutin minute 10 chauh pawh khel se, minute 10 ṭha ber a khel ang," tiin Brazilian forward a fak hle.

Player 5 thlak
Man City hian an match hmasa berah Tottenham Hotspur 1-0 in an hneh lo a, Pep-a'n Covid-19, Euro 2020 leh Copa America vangin team ṭha ber chhawr thei lo. Norwich lakah pawh hian an thiampuipa Kevin de Bruyne leh Phil Foden te an la chhawr thei lo a, chutihrualin player panga a thlakin a awmzia a nei hle.

Pep hian Benjamin Mendy, Nathan Ake, Fernandinho, Riyad Mahrez leh Raheem Sterling te bench-ah a dah a, an aiah Kyle Walker, Aymeric Laporte, Rodri, Jesus leh Bernardo Silva te an lut. Spurs leh Norwich khaikhin a rem lo nachungin Canaries hmachhawn tute hi tlarhnung lamah an khawng zawk avangin team ṭha zawkah a ngaih theih.

Walker leh Rodri ten goal luh theih nan pass ṭha an nei ve ve a, Laporte-a'n goal a khung. Chutihrualin player manto Grealish erawh Man City game pawt muangtuah a ngaih theih a, a hmawr bawk fuh thei tlat lo.

Chutihrualin Sterling leh Mahrez te erawh bench-ah awm mah se Man City tan player pawimawh an ni a, bench aṭanga an luh hnuah goal hmaa an hriam zia a lang. Norwich-in Ruben Dias telna Man City tlarhnung tan harsatna an siam lo.