Ronaldo a chhuak dawn lo

Juventus manager Massimiliano Allegri chuan tun nipui bazar chhungin Cristiano Ronaldo a chhuah loh tur thu a sawi.

Ronaldo hian kar hmasa khan instagram kaltlangin chhuak tur anga a chungchang an sawina chu thu belhchian dawl lo a nih thu a lo sawi tawh bawk.

Kum 36 mi Ronaldo hian Champions League nomawi chawi duh Juventus a zawm a, Old Lady nen hian an beisei ang tak hlawhtlinna an la chang lo. Season hmasa zawh hlim khan Ronaldo hian Turin aṭangin a car man tam neih ho a lo phur chhuak tawh.

Tun hmain Ronaldo hian Real Madrid a chhuahsan dawnin a car man tam ho chu Madrid khawpui aṭangin a lo phur chhuak hmasa tawh. Serie A club chhuahsanin club thar a zawm leh mai ringtu pawh an tam hman hle.

Juve manager thar Allgeri chuan, "Ronaldo hian chhuah a duh thu a lantir ngai lo, Juve tana khel zel tura cham a duh thu min hrilh," tiin a sawi a, Italian manager thusawi aṭanga thutlukna siam tur chu ni se Ronaldo a chhuak dawn lo.

Portuguese forward hi a club hlui Real Madrid leh Manchester City te nen sawizawm a ni a, club hausa Paris St-Germain hming pawh a ri. Mahse, Paris club hi chuan Lionel Messi an neih tawh avangin an neihsa an chhuah ṭhen a nih loh chuan Ronaldo lak a harsa dawn.

Ballon d'Or vawi nga dawng tawh Ronaldo hian Allianz Stadium-ah thla 10 daih contract a la nei mek, tunah chuan a contract hi pawhsei emaw tih tawp emaw tumna a la awm lo - inkhelh a chawlhsan hmain club dang erawh a neih a la rinawm.

Ronaldo awmna Italian club ṭha Juve hian nizan khan tun season Serie A an match hmasa ber an khel a, an result kan hre hman lo.