Match thum chak zawn PSG

Lionel Messi leh Neymar te la khel rih lo mah se Kylian Mbappe a awm chuan buaina a awm rih lo. Paris St-Germain chuan an mikhualna ramah Brest 4-2 in an hneh, tun season Ligue 1 match thum an khelh tawhah an la chak fai vek.

Season hmasa khan PSG hian Lille lakah an league nomawi an chan a, kuminah chuan chan nawn an tum lo. Mauricio Pochettino naute hian league hma an hruai nghal miau avangin team dang tan tlan pelh a harsa tawh khawp ang.

PSG tana chanchin lawmawm lo erawh an striker Mauro Icardi a inhliam. Argentina international hi a dar (shoulder) hliam vangin thlak a ngai a, a zawna match hnih chhung goal khung tawh hi eng chena a rei nge a chawlh dawn tih erawh hriat a la ni lo.

Goal a tam
Zirtawpni zan Stade Francis-Le Ble-a inkhelah PSG tan - Ander Herrera, Kylian Mbappe, Idrissa Gueye leh substitute Angel di Maria ten goal khat ṭheuh an khung a, mualneitu lam tana Franck Honorat leh Steve Mounie te goal khungin awmzia a nei phak lo.

France international Mbappe hian season hmasa khan league goal 27 a khung a, ani aia khung hnem an awm lo. Tun season an league match hmasa pahniha Troyes leh Strasbourg an khelh ṭumin assist a nei a, tunah chuan a goal hmasa ber a nei chhunzawm leh ta.

Kum 22 mi forward hi nipui bazarah chhuak tur angin a thawm a ring hle. Real Madrid nen sawizawm mek a ni a, mahse a dinhmun chiang taka sawi theih a la ni lo, a contract neih lai hi tun season tawp ruala tawp tur a ni ang.

Messi leh Neymar
Barcelona captain Messi-a'n PSG a pan hnuah kar khat chuang training a nei tawh a, mahse match pangngai a la khel lo. Messi ang bawkin chawlh hmang rei Neymar pawh a la inkhel lo, coach Pochettino-a'n an match lehpekah chuan an inlan tawh mai thei tiin a sawi.

Player thar zingah Giorginio Wijnaldum leh Achraf Hakimi ten inkhel bul an ṭan leh nghal a, hmun pawimawh an chang chhunzawm zel ang. Euro 2020-a Italy champion puitu Marco Verratti pawh ṭha takin a inkhel leh tawh, team hmuhnawm an ni dawn chiang.

Euro best player Gianluigi Donnarumma erawhin hun ṭha a nghah rih a la ngai, Italy internaiotnal hi bench lamah dah a la ni. Defender Sergio Ramos erawh hliam vanga chawl a ni a, Real Madrid captain hlui hi September thlaah chuan a inkhelh theih tawh a rinawm.

Chak a pawimawh
PSG manager Mauricio Pochettino chuan, "A bul kan ṭan fuhin goal pawh kan nei hma, hun chanve hma lamah khel ṭha viau mah ila goal kan chhuah, second half-ah pawh goal khat bawk kan chhuah leh, siamṭhat ngai lai chu a la awm.

"Duhthusama ṭhain kan la khel chhuak lo, chutih rualin point thum hmuh hi a pawimawh lai chu a ni. Euro leh Copa vangin training kan nei kim har a, match lina aṭang chuan tun aia ṭha leh kim zawkin kan khelh theih ka beisei," tiin a sawi.

PSG hian an league match palina atan August 39, Pathianni zanlaiah Reims an lenchilh leh ang. Reims hi match hnih an khelh tawh china chak la nei lo an ni a, nizan khan Metz nen inkhelin an result erawh kan hre hman lo.