Serie A Champion Inter an chak chiang
Inter Milan chuan an manager Antonio Conte leh striker ṭha Romelu Lukaku chân mah se season bul an ṭan fuh. Italian champion hian Inrinni zan khan an mikhual Genoa chu 4-0 a sawpin point thum an hlawh chhuak nghal.
Champion tura rinkai zinga mi Atalanta pawh an chak. Inter ang thoin Atalanta hian an player pawimawh Cristian Romero chu Tottenham lakah an chan a, mahse an match hmasa berah Torino chu 2-1 in an luhchhuah ta tho.
Goal a sur
San Siro-a inkhelah mualneltu Inter Milan chuan a khat mawi tawkin goal an khung deuh reng. Minute rukna lekah Milan Skriniar hmangin goal hmahruai an khung ṭan a, player thar Hakan Calhanoglu-a'n chawlhlawk hmain an goal hnihna a khung bawk.
Inkhel chawhnu lamah pawh Inter bawk an chungnung. Tawnhriat nei Arturo Vidal leh AS Roma aṭanga an lak thar striker Edin Dzeko ten goal khat ve ve khung lehin, an mikhual lakah harsatna lian tham an tawk lo.
Manager thar Simone Inzaghi-a'n eng ang takin nge a naute a remkhawm dawn hriatthiam a la harsa, chutih rualin an inkhel erawh a hmuhnawm nghal. Ball chang hnem chungin inkhel an thunun a, an goal an venhim bakah goal an khung hnem avangin bul ṭanna duhawm tak a ni ngei ang.
Inlan lo langsar
Lautaro Martinez chu hrem vangin a inlan thei lo, Alexis Sanchez, Roberto Gagliardini leh Christian Eriksen te chu hliam vangin an inlan thei lo. Denmark international Eriksen bik hi chu a inkhelh leh theih beiseina a sang tawh lo.
Player pawimawh ṭhenkhat inlan thei lo mah se AC Milan aṭanga an lakluh playmaker Calhanoglu a hmuhnawm a, inkhel chawk nungtu leh khaikhawmtu pawimawh a nih avangin dinhmun pawimawh a luah chhunzawm ang.
Manchester City striker hlui Dzeko pawh a la tar lo. Kum 35 mi striker hian goal a khung a, amah ang bawka player thar Calhanoglu khung tur a siamsak bakah crossbar a tih per bawk - Serie A match 200 khel tawhtu hian Inter tan goal dang a la khung belh leh ngei ang.
A lungawi
Sum dinhmun buai tak karah leng mah se Inter Milan-in bul an ṭan fuh a, manager thar Simone Inzaghi chuan hetiang baka ṭha chu an beisei loh thu a sawi, season bul an ṭan danah leh a naute khelh danah a lungawi hle.
Nerazzurri manager Inzaghi chuan, "July 8 aṭang khan training ṭha takin kan nei tawh a, ka naute hian ṭha takin an khel ang tih hi ka chiang a ni. Beisei ang ngeiin an khel a, hetiang baka ṭha hi chu beisei tur a awm tawh chuang lo ang.
"Calhanoglu leh Edin Dzeko ten goal leh assist an nei ve ve, player ṭha leh theihna nei sang an nih avangin a mak hran lo. A bik takin Calhanoglu hi tun hma aṭanga ka hriat chian, team dang ka enkawl lai pawha ka lo chik tawh a nih avangin min barakhaih lo," tiin a sawi.
