Premier League fixture a chhuak ta Liverpool tan champion hun a hnai

Khawvela league ngaihven hlawh ber tih ngam Premier League chuan June 17-a league an khelh chhunzawm tur thu an tihchian hnuah fixture an ti chhuak ta a, Liverpool tan champion hun a hnai ta sawt tihna a ni. 

June 17 zanah hian Aston Villa chuan Sheffield United an hmachhawn dawn a, Premier League chhunzawm leh a nih hnua match hmasa ber tur a ni dawn. June 17 zan dar 12:45-a Manchester City-in Arsenal an mikhual tur hi hmuhnawm a tling bawk ang. 

Premier League hian match 32 atan fixture an ti chhuak phawt a, kar thum chhung khelh tur niin nitin deuhthaw inkhel en tur a awm dawn. Champion tura match hnih chiah chak mamawh tawh Liverpool chuan June 21 zanah Everton lenchilhin bul an ṭan dawn. 

June 19 zanah Tottenham Hotspur chuan Manchester United an mikhual dawn a, June 21 zanah Chelsea chuan Aston Villa an lenchilh ve thung ang.

Aston Villa leh Sheffield United inkhel tur hi club tenau inkhel en tur angah i lo in dah a ni mai thei a, an hmaa beiseina inchhawp thlir tel chuan he inkhel hi a hmuhnawm dawn. 

Villa hi tlak hlau, him tuma theihtawp chhuah tur an nih laiin beisei aia season hmang ṭha Sheffield hi European football khelh beisei an ni thung - season hmasaa Championship club pahnih inkhel tur hian mit a tih tlai loh ring suh. 

Manchester City-in champion nomawi beisei thei tawh lo mah se chak duhna thinlung erawh paih bo sak theih an ni lo a, UEFA Financial Fair Play Regulations (FFP) vanga kum hnih chhung European football khel thei lo dinhmunah an ding mek thung. 

City hian hremna hi khinglet mah se hnehna an chan loh chuan Premier League-a pangana chu City hmun ruak luaha palina ni tur an ni dawn a, he hmun beisei hian Arsenal chuan City hi hneh ngei an tum ang - a hmuhnawm dawn. 

Liverpool fan-ten Premier League nomawi chawi avanga champion lawmna hla an sa ṭep tawh a, Arsenal-in City an hnehsak chuan an hlim hma lehzual ang - champion tura match hnih chak mamawh team hi City an tlawm chuan match khat chakin an champion thei. 

Chumi awmzia chu Merseyside derby-ah Liverpool hi an champion thei dawn tihna a ni. Arsenal-in City an hneh a, Reds hian June 21 zanah Everton an hneh chuan Premier League champion an ni dawn. 

Arsenal hian City an hneh zo ta lo a nih pawhin Liverpool-in June 24 zanah champion theihna remchang an nei lehnghal dawn a, Crystal Palace an mikhual ang. 

Hriat tel tur erawh venhimna lama hlauhthawnna avangin Liverpool hian Merseyside derby-ah Goodison Park an len luh theih dawn leh dawn loh a la chiang lo a, Reds hian neutral venue-ah champion an lawm a ngai ta a nih pawhin mak ti suh. 

Premier League chief executive Richard Masters chuan, "Premier League khelh chhunzawm kan tumna kawnga kan hmalaknaah fan-te lawmna tur kan puang zel thei hi lawmawm ka ti. 

"Kan fans rinawm tak tak te tel lo chuan stadium boruakin ngai a awh dawn lo tih chu kan hrethiam a, mahse kan thawhpuite nena thawhhona ṭha zarah fan-ten in lam aṭangin nuam takin an en thei dawn a ni," a ti. 

UK bikah chuan Sky Sports, BT Sport, BBC Sport leh Amazon Prime-te chuan inkhel hi live-a en theih turin an pe chhuak dawn a, Sky Sports chuan match 25 an pek tur chu a thlawna en theih turin an pe chhuak dawn a, Amazon Prime chuan match li a thlawnin an ti chhuak bawk ang.

Keini lamah chuan Star Sports bawk chu Premier League enna tur a ni leh dawn. Premier League hi Covid-19 vangin ni 100 zet chu khelh a ni tawh lo a, football fan-ten an mit ti tlaitu Premier League an en leh hnai ta e.