Anfield-ah Liverpool an vul

March 11, 2020 hnua a vawi khat nan Anfield khat tlatin fans an pungkhawm a, an beisei ang result an hmu bawk - Liverpool chuan Inrinni zan khan an mikhual Burnley chu 2-0 in an hneh.

Liverpool tan Diogo Jota leh Sadio Mane ten goal khat ve ve an khung a, Burnley lamin a chhanletna tur an nei lo. Liverpool captain Jordan Henderson a rawn kir leh ta a, rawlthar Harvey Elliott a khel ṭha takzet bawk.

Anfield-a inkhelah hian Liverpool ṭantu ruhkawl Andrew Devine hriatrengna hun hman a ni. Kum 1989 Hillsborough chhiatnaah khan Devine hian hliam na tak a tuar a, kum 55 mi fan ruhkawl hi July khan a thi a ni.

Liverpool an thiam
Season hmasa an hman ṭhat tawk loh avangin champion tur rin kai zingah Reds-in sawi an hlawh tawk lo a, khelmualah champion an la tum reng tih an pholang thung.

Minute 18-na lekah Jota chuan goal khung mi a ni tih pholangin tun season match hnih a khelha a goal hnihna a khung a, Andy Robertson inhliam vanga bul ṭan Konstantinos Tsimikas siamsak a ni.

Liverpool tlarhnungah Virgil van Dijk leh Joel Matip-te an inkawp leh tak avangin Reds tlarhnung an nghet ṭha a, VVD telna Liverpool team danglamzia kan hmu nawn. Liverpool goal hnihna luhna kawnga Dutch defender hnathawhte kha hmuh hmaih theih a ni lo.

VVD hian ṭha zetin ball a vawrh lut a, hei hi kum 18 mi Elliott chuan a awma lo la thlain Trent Alexander-Arnold a pe a, English defender hian mawi zetin Mane tan a pe zui - Senegalese forward-in goal-ah a chantir a, 2-0 in Liverpool an chak.

Lawm a kim lo
Liverpool-in league match hnih an khelhah goal nga an khung a, an chhuah miah lo bawk - Reds tan bul ṭan dan duhthusam a ni a, Mohamed Salah goal khung pawm se 3-0 a chak thei hial an ni. Burnley tana Ashley Barnes goal khung pawm a ni bik lo tih hriat tel erawh a ṭha.

Chutih rual chuan season hmasa khan Burnley hian Anfield-ah 1-0 in Reds an hneh a, league match 68 mahni muala an tlawm lo chu an tihtawpsak. Liverpool-in Burnley chak kha 'tihpalh' a ni tih result hmangin an lantir sak a, Jurgen Klopp-a lawm erawh a kim lo.

Season ṭan dawn khan referee-te chu ho tetea hremna pe lo tura hriattir an ni a, an zawm ṭha mah mah - Burnley-in free kick 12 an chawi chungin yellow card hmu an awm miah lo.

Klopp chuan, "Khatiang foul kha hmuh nuam kan ti a nih chuan wrestling en mai tur a ni. Kum 10/15 liam taa let leh ang mai alawm kan nih," tiin official-te 'fimkhur lutuk' chu a dem.