India ramah futsal tihhmasawn an tum

Asia ram football thuneitu sang ber AFC leh India rama football thuneitu sang ber AIFF chuan tun hnai khan futsal chungchangah online meeting an nei a, hmalak dan tur n rel.

AIFF general secretary Kushal Das chuan, "Futsal hi tun hnaia infiamna ṭhang duang ber zinga mi a ni a, hun remchang hmasa berah futsal inelna kan buatsaih ang. October emaw November emaw hian National Club Championship chu Meghalaya-ah neih tum a ni," tiin a sawi a, AFC-in India rama futsal hmasawnna tura hma an lak avangin lawmthu a sawi bawk.

AFC hnuaia Head of Futsal and Beach Soccer Ali Targholizadeh chuan, "Futsal hian player-te thutlukna siam kawngah nasa takin a pui a, hmasawnna tak tak nei tur chuan coach an pawimawh. Zirchianna aṭang chuan China leh Malaysia ten futsal vangin football-ah pawh nasa takin hma an sawn," tiin a sawi a; India chu Futsal leh Beach Soccer-a Asia khawmualpuia ṭha ber an nih theih thu a sawi.

Futsal hi football association hnuaiah mumal taka kalpui a ni a, khawvel football thuneitu sang ber FIFA hnuaiah an inchhunglut vek.

FIFA hnuaia futsal inelna lian ber FIFA Futsal World Cup chu September 3 leh October 3, 2021 chhung hian Lithuania-ah khelh a ni dawn a, khawmualpui paruk aṭangin ram 24 an tel ang.