Daniil Medvedev a chak lo

Champion tura rinkai Daniil Medvedev chu Cincinnati Masters semifinal-ah Andrey Rublev hneh loin a tla a, hmeichhe inelna lamah world number 1 Ashleigh Barty erawhin final a inhlangkai thung.

Russian tlangval pahnih inkhelah Rublev-a'n set a hloh hmasa, tun hma lamin Medvedev hi a la hneh ngai loh avangin chak lo chiang tura ngaih a ni. Mahse, a sulhnu chhe tak thai reh turin 2-6, 6-3, 6-3 in hnehna a chang let.

Semifinal inkhel dangah Alexander Zverev chuan Stefanos Tsitsipas chu 6-4, 3-6, 7-6 (7-4) in a hneh thung. Nizan zanlai khan Tokyo 2020 champion Zverev leh Rublev ten final an khel zui a, result kan hre hman lo.

Hmeichhe inelna lamah Barty leh Karolina Pliskova hnehtu Jil Teichmann nen nomawi an inchuh ve bawk. Australian star Barty hian Cincinnati Masters-ah hian set hloh miah loin final a in vaw thleng thei a ni.

Chak lo mah se Medvedev a beidawng lo a, tun thla tawpa khelh tur US Open-ah a vawi khat nan Grand Slam title lak theih ngei a beisei. Hard court hi a inkhelh thiamna hmun a nih avangin beisei a nei sang ngam.

World number 2 Medvedev chuan, "Theihtawp ka chhuah dawn, ka ṭhat theih dan ang berin khelh chhuah ka tum ang. Tuna ka chak lohna hian a ṭha zawnga nghawng a neih ngei ka beisei," tiin US Open a thlir lawk.

Tennis season khat chhunga Grand Slam hnuhnung berah hian Rafael Nadal, Roger Federer, Stan Wawrinka, Dominic Thiem leh Juan Martin Del Potro te an inlan thei dawn lo tih a chiang tawh a, player dang tan kawng a inhawng zau dawn.

Amaherawhchu, world number 1 Novak Djokovic a la awm a, ani bakah hian German tlangval Zverev leh Russian star Rublev te hi elpui hautak tura ngaih an ni.