Depay-a'n goal a khung, mahse an chak zo lo!

Barcelona tan Memphis Depay chuan a goal hmasa ber a khung a, mahse, Dutch forward goal khung hian Barca tan point thum a pet chhuak zo lo thung.

Catalan club hian Inrinni zan khan khualmualah Athletic Bilbao an lenchilh a, point khata lungawi zir chungin Bilbao khelmual an chhuahsan a, 1-1 in an inhnehtawk.

Bilbao tan hian Inigo Martinez chuan goal hmahruai a khung a, Barca tan Depay chuan Catalan club a pan chhan pholangin si phurh sutna goal hi a khung.

Mahse, Barcelona-in goal dang an khung thei tawh lo a, hun pek belh minute thumnaah defender Eric Garcia chu hnawhchhuah a ni ta zawk - match hnih aṭangin point li an nei.

Bilbao an huaisen
Athletic Bilbao-in an league match hmasa berah goal khung loin Elche an inhnehtawkpui a, an match hnihnaah chuan chak ngei an duh tawh - Lionel Messi tel lohna Barcelona lakah inthlahrun an tum lo.

Inkhelh ṭantirh aṭangin Bilbao-in Barca tlarhnung an sawi nghing a, Inaki Williams ringawt pawh Catalan club tan buaipui tham a ni - a kawppui Ohian Sancet nen an hlauhawm ṭhin hle.

Kum 21 mi Sancet hian minute lina lekah mawi zeta ball a virpui hnuah goal-ah a pet a, crossbar-in Barca a chhanhim. Second half ṭantirah Berenguer Remiro chuan chance duhawm a nei bawk a, mahse, minute 31-naa hliam vanga Gerard Pique lakchhuah a niha thlaktu Ronald Araujo chuan goal line aṭangin a lo pet chhuak.

Bilbao an vanduai reng lo - minute 50-naah Martinez-a'n a khung ta nge nge a, corner aṭanga ball kal chu Barca defender ven karah a tauh lut. Catalan club an hawihai a, Bilbao an phur sawt thung.

A changtupa Depay
Barca-in si an phurh hnuah nawr let an tum viau a, mahse, an ṭang hleithei lo - Bilbao zawk bawk chu a hlauhawm an ni a, mualneitu team hi an chak mai dawn niin a lang hman.

Mahse, nipui transfer-a free transfer-a Barca pantu Depay-a'n sum harsatna kara Barca-in an duh chhan a pholang a, minute 75-naah kawh ṭha zetin si phurh sutna goal a khung.

Kum 27 mi Depay hian season hmasa khan Lyon tan inelna hrang hrangah match 40 khelin goal 22 a khung a, assist vawi 12 a nei bawk - tun season-ah Barca tan match hnih khelin goal khat a khung a, assist vawi khat a nei ta.

Lionel Messi hmun ruak meuh chu Depay tan luah khah hnehna a awm lo ang tih chu thil chiang a ni a, mahse, club-in hun thim an tawh laia fan-te beiseina siam tur erawhin he forward hian theihna a nei.

Fakna leh selna
Barca-in point thum hlawhchhuah theihna tura ngaih team lakah point khat an hlawh chhuak leh hram a, Catalan club hian Messi tel loa champion an tum a nih chuan insiamṭhat an mamawh.

Hun pek belhah Garcia hnawhchhuah a ni a, Nico Williams-a ball chang fal tur a tih tluk vang a ni - Garcia hi foul lo ta se Barca hi si phurh belh thei dinhmunah an ding tihna a ni a, Ronald Koeman-a'n insiamṭhat an mamawhna laiah hma a lak vat a ṭul.

Hetihrual hian Barca hi an vanduaina zawn thlirsak chuan an vanduai ve tho. Ronald Araujo-a'n mawi zeta goal a 'bin' luh chu Martin Braithwaite a foul vangin pawmsak a ni lo a, Danish striker hian hnai set sawt aṭangin a hlah bawk.

Frenkie de Jong-a'n mawi zet a 'chip' hnuah crossbar a per a, Depay-a'n a chance neih dang a hlah bawk - a tawi zawnga khaikhawm erawh chuan Bilbao-in point hlawhchhuah an phu a, Barca-in chak an phu lo.