Bundesliga hmahruaitu Van Bommel-a hote

Wolfsburg chuan Inrinni zan khan Hertha Berlin 2-1 in an hneh a, match hnih khelhah Mark van Bommel hote chak ve vein point ruk hmuin hmahruaitu an ni.

Olympiastadion Berlin-ah mualneitu Hertha Berlin-in Dodi Lukebakio penalty hmangin minute 60-naah goal an khung hmasa a, Wolfsburg-in Ridle Baku leh substitute Lukas Nmecha te hmangin an sut.

Wolfsburg tana goal khungtu pahnih Baku leh Nmecha hi German rawlthar ṭha pahnih an ni. Kum 23 mi Baku hi season liam ta khan Bundesliga team of the season-ah a tel a, right wing leh right back-a khel kawp thei a ni.

Kum 22 mi Nmecha hian euro maktaduai 8-in Manchester City aṭangin Wolfsburg hi a zawm a, tun nipuia neih UEFA European Under 21 Championship-ah khan Germany champion puiin top scorer a nih bakah team of the tournament a tel.

Wolfsburg hi season liam taa palina an niha vangin Champions League an khel dawn a, dinhmun ṭha taka hlang kaitu coach Oliver Glasner hian Eintracht Frankfurt a pansan avangin Barcelona leh Bayern player hlui Mark van Bommel an lalut.

Kum 44 mi Van Bommel hian head coach ang chuan tawnhriat a la ngah lo a; Australia leh UAE tan assistant coach hna a thawk tawh. Ram pahnih assisant hna a thawh inkarah hian PSV a enkawl tawh thung.